إحنا مرضى والدوا فوق الكمامة
فاتركونا نخف واوعو تطببونا
إحنا ناخد نظرة من عين اليمامة
وانتو تاخدوا علاجكو من عين الكورونا
فيروسات والجو مش ناقص جهامة
والبارود غطانا من طوبة لبؤونة
واتقسمنا بين عمامة وبين إمامة
واللي بينهم وسعوا الهوة وخانونا
واتسلخنا من المروءة وم الكرامة
واتعصرنا واتعصر فوقنا لمونة
في قلوبكو الحرب وقلوبنا السلامة
و ف إيدينا الورد وإيديكو العفونة.
إن بدينا الظرف تبدو لنا الرخامة
وإن بدينا الرقة تبدو لنا الخشونة
دا إحنا لبسناكوا بإيدينا البيجامة
وانتوا بأيديكوا اللئيمة سمتونا
إحنا خامة فقر وخامتكوا الفخامة
حلوا عنا وابعدوا عن دار أبونا
إحنا سمر وانتوا غاية في الوسامة
والقرايب والحبايب يشبهونا
إحنا لو هنعيش إلى يوم القيامة
مش هنلقى إلا هما يفهمونا
.......
أما انتوا ياللي واخداكو الصرامة
الحواس الستة جوه بيضربونا
افتحولنا السجن راضيين بالغرامة
مشتاقين للحب أرجوكوا ارحمونا
لما كنا صغيرين حبينا ياما
وف بنوك الحب بمهوركم باعونا
والنهاردة بنرمي نظرة وابتسامة
واما بيحين اللقا بناخد صابونة
والصراحة تعبنا من توب الأيامة
واللي جوه تيابنا محتاج المعونة
فاكشفولنا الثغر لو فيكم شهامة
وامنحونا القرب واوعوا تكممونا