قالت الفنانة منى زكي،
إن علاقتها بالتمثيل بدأت بالصدفة، إذ كانت فى مرحلة الطفولة تشارك فى المسرح
المدرسى ليس كممثلة ولكن خلف الكواليس.
وأضافت فى ندوة،
أدارتها الإعلامية رايا أبى راشد، أقيمت ضمن فعاليات تكريمها بمهرجان القاهرة
السينمائى الدولى بالدورة 42: "فيه حد غاب ولقيتهم بيقولولى لازم تلبسى الملابس
دى وتطلعى تقولى الجملة دي، كان وقتها عمرى 11 سنة، وقلت الجملة بشكل جد جدا ولقيت
الناس بتضحك لأنها جملة بتضحك، اتكسفت وحسيت إن ده مش حاجتى لأن الناس ضحكوا،
وحسيت انى موضوع تريقة وبطلت أشارك فى أى حاجة".
وأضافت "جينا مصر
وأنا عندى 13 سنة وقاعدة مع مامتى لقيتها بتقولى الفنان اللى انتى بتحبيه وبتتفرجى
على مسرحياته محمد صبحي، عامل مسابقة عايز وجوه جديدة، السيلفى بتاعنا وقتها انك
تشوفيه على الحقيقة، وكتبت فى نموذج التقديم انى برقص وأنا طبعا مبعرفش أعمل أى حاجة،
عايزة أدخل وخلاص".
سألها صبحى ماذا أعدت
لتقدمه، فنفت تجهيزها لأى مشهد وطلب منها أن تأتى بعد يومين وتكون وقتها حفظت أى مشهد
من أى مسرحية تحبها له، متابعة "اخترت مشهد من مسرحية لمحمد صبحى مع شريهان
العظيمة، كان نفسى يكون فيه تسجيل لده، كنت بقول الكلام وبسمعه وانا ببص فى الأرض،
خلصت، فلقيته قالى أنت هتبقى كويسة، ومحتاجة تركزى على الكلام ونطقها بالعربى بشكل
سليم، أول ما ابتدينا بروفات وإعداد ممثل اكتشفت مهارات، وإزاى تحركى مشاعرك،
اللحظة دى النداهة ندهتنى واتسحرت".
وأكدت أن التمثيل يجعل
من يقوم به يشعر بعظمة الإنسان، والمخرج يساعد الممثل فى الوصول لهذه الحالة.
منى زكى حصلت على
جائزة فاتن حمامة للتميز، فى حفل افتتاح مهرجان القاهرة السينمائى بالدورة 42.