هاجمت الناقدة ماجدة خير الله، الحلقة الأولى من مسلسل لحم غزال، بطولة غادة عبد الرازق، وبالتحديد مشهد إحراق الفنان حمدي الميرغني وهو على قيد الحياة.
وقالت خير الله عبر صفحتها على فيس بوك: "لما تكون بتحمر سمك أو لحمة والطاسة تتحرق، الريحة والدخان بيملى المكان عدة ساعات، ولازم الشفاطات تشتغل وتفتح كل شبابيك البيت لتتخلص من الريحة، مش كده برضه؟ طيب لو بتحرق بني آدم بحاله في شقه ضيقه في حارة بيوتها مزنقة في بعض!! ممكن تختفي الريحة وآثار الجريمة بعد قد ايه".
وأضافت: "المشهد كالتالي في مسلسل لحم غزال، غادة عبد الرازق تستدرج الديلر حمدي الميرغني، حيث تعتقد ان له يد في اختفاء ابنها، ثم تدلق عليه بنزين وتولع فيه!! وطبعا يقعد يتحرق عده ساعات ، بدون ان يصرخ او يصدر عنه اي صوت، وعندما يتحمع الجيران ، علي اثر تصاعد رائحة الادخنه، تفتح غاده عبد الرازق (غزال) الباب بمنتهي الثبات الانفعالي وتقولهم ان حله اتحرقت منها وتقفل الباب وخلاص كده! وتفضل الشبابيك مقفوله ، ومفيش اي اثار حريق في الشقه!".
وواصلت: "حتي مساء نفس اليوم عندما تتعاون غاده ومي سليم علي نقل بقايا الجثه في سياره!! عادي جدا السياره تدخل الحاره وغاده ومي في ملابس مختلفه ونظارات وقال كده محدش حاياخد باله!! طبعا تفصيله زي دي ممكن تقفل المتفرج من المسلسل تماما! في الحقات الاولي من اي مسلسل رمضاني مفروض انه بينافس عدد صخم من الاعمال الكبيره، لازم يلتزم كل صناع المسلسلات بما نطلق عليه براعه الاستهلال، عشان تسحب اهتمام وفضول المشاهد وتدفعه لمتابعتك ! ولكن حاتستهبل فيها من الاول يبقي يفتح الله فيه مسلسلات كتير غيرك تستحق الاهتمام!".
