تفحص أجهزة الأمن بالقاهرة فيديو السائق ميني باص متعاطي الاستروكس بمنطقة النهضة، للتأكد من صحته وإتخاذ الإجراءات القانونية اللازمة حيال السائق في حالة ثبوت تعاطية للمخدرات.
وتداول رواد مواقع التواصل فيديو لأتوبيس "ميني باص" يقف في وسط الطريق، ويظهر السائق في حالة عدم اتزان، ثم يقوم زملائه بمحاولة إفاقته، وبعدها بدل سائق آخر مكانه فى كرسى القيادة، بعد وضع السائق الأول على الكرسي المجاو.
وقال مصور الفيديو إن السائق كان غير متزن، ويظهر تعاطيه للمواد المخدرة، مضيفًا فى منشور على "فيسبوك": "أنا من سكان مدينة النهضة، وهي مليانة مخدرات بالتحديد الأستروكس، والشباب بتبقى خارج الوعي تمامًا لدرجه أنك لو كنت بتكلمه تبقى بتكلم الهواء".
وتابع: "نازل شغلي متأخر وبالصدفة نازل السيدة زينب وراكب توكتوك من عند البيت للموقف شوفت الميني باص بيتحرك، وأنا داخل على الموقف قولت للتوك توك إلحقه نزلت وركبت جنب السواق وطلعت الأجرة، وواضح فى التصوير فيه 10 جنيه، وبقوله خد وبستوعب العربيه واقفة كده ليه لقيته بالمنظر ده".
وأضاف مصور الفيديو: "حظي إنى ركبت جنبه، وأنا ولا أعرف السواق ولا بركب من هناك باستمرار، بس الموضوع كبير شويه لما سواق بالمنظر ده يتحرك بالأتوبيس بالأرواح اللي معاه.. وعملت محضر في قسم النهضة عشان لو نقدر نخلص من المخدر ده و نهتم شويه بأرواح الناس".