أعد التسجيل للنشر: محمد المكاوى
فى أوائل السبعينيات وقع خلاف حاد بين البلبل فريد الأطرش والعندليب الأسمر عبد الحليم حافظ بسبب حفلات الربيع ،وتحول هذا الخلاف إلى تراشق بالكلمات بينهما والصحافة اللبنانية كانت ساحته ،الى ان نجح التليفزيون اللبنانى فى الجمع بينهما فى اللقاء الشهير وانتهى بعناق بين الاثنين واتفاق أن يغنى حليم من ألحان فريد ، وتعهد الاثنان أمام الجمهور بتنفيذه فى القريب العاجل ، وبالفعل اختار حليم كلمات كتبها الشاعر حسين السيد -"زمان ياحب"- وتعددت لقاءاتهما واتصالاتهما لإنجاز هذه الأغنية ،ولكن العندليب عنما سمع اللحن فى صورته النهائية وجد أن شخصية الموسيقار الكبير تطغى على اللحن ،وأحس فريد أن حليم يتهرب من غنائه ،فما كان منه إلا أن غناه الموسيقارالكبير فى فيلم وضع اسم الأغنية عنوانا له وكانت واحدة من أجمل وأنجح أغنياته ،وشارك فيه نخبة من نجوم التمثيل .. زبيدة ثروت وليلى طاهر ومديحة كامل ويوسف وهبى من إخراج عاطف سالم ، لكن العلاقة الإنسانية بينهما ظلت كما هى حتى آخر أيام الموسيقار الراحل.
وهذا التسجيل النادرالذى تم بينهما عبرالإذاعة المصرية جرى فى أعقاب هذا الصلح وأثناء استعدادهما للتعاون الفنى، وتبدأ المكالمة بجرس التليفون وهو يرن فى منزل فريد حيث كان يقيم فى القاهرة
فريد: أيوه
حليم:آلو ..مين؟
فريد: أهلا
حليم:مين؟
فريد: عبد الحليم
حليم: أيوه ياحبيبى
فريد: صوتك ..عرفتك
حليم:إزيك
فريد:صباح الخير
حليم:صباح الفل
فريد:إزى صحتك
حليم: إزى صحتك
فريد:كل سنة وانت طيب
حليم:وانت بالصحة والسلامة
فريد:بتعمل إيه؟
حليم:بقولك إيه
فريد:إيه خير
حليم:بكلمك عن طريق الإذاعة بيسجلوا لنا المكالمة
فريد:لأه.. "يضحك" طب ده كويس عشان بالمرة نعيّد على اللى بيسمعونا إن شاء الله
حليم: "يضحك أيضا" آه ..كل سنة وانت طيب ياحبيبى
فريد:وانت طيب ياحبيبى
حليم:الله يخليك.. بقولك إيه هوه حسين جالك؟
فريد:حسين عثمان
حليم:حسين السيد
فريد:لا .. ماجاش
حليم:ماجاش ..إزاى؟
فريد:لا والله لسه ماجاش .. انت قلت لى هاتتصل بيه
حليم:انا اتصلت بيه ياحبيبى والمفروض يجيلك دلوقت
فريد:لا والله ماجاش ولا كلمنيش حتى
حليم: ولاكلمكش؟!
فريد:لأه
حليم:آه يبقى أكيد جاى فى السكة
فريد:على كل حال أول ما يجى هانتصل بيك واللا مش هاتفوت علينا نشوفك؟
حليم:آه ما أنا جايلك، بقولك إيه
فريد:نعم
حليم: وانت إزيك النهاردة ؟
فريد: انا الحمد لله كويس جدا
حليم:كويس
فريد:كويس خالص..إمبارح والله سهرت بالليل ياعبد الحليم لغاية الساعة 6 الصبح وحياة ربنا وقعدت أسجل حاجات وخواطر للحن
حليم: ياحبيبى انت بقى دلوقت بتحملنى ذنب واللا إيه؟
فريد:لا مش بحملك ذنب ،انما عشان أوريك ان أنا عايش وياك دايما وعشان خاطر نقدم حاجة حلوة قوى
حليم:انا المهم انك تريح نفسك وخد الوقت اللى يريحك
فريد:ربنا يخليك ..ماانت عارف الفنان وانت كده زيى
حليم: "يضحك"
فريد:انت عارف لما الواحد يكون مخه شغلاه حاجة
حليم: ربنا يخليك
فريد:عايز يحققها يارب
حليم:احنا المهم عندنا صحتك وان شاء الله اللحن هايطلع كويس وكل حاجة هاتطلع كويسة
فريد:ربنا يكرمك ويخليك انت وصحتك وجمالك وصوتك الحلو ده
حليم:ربنا يخليك
فريد:معلوم ..والنبى تفوت على أشوفك عشان نقعد نتكلم مع بعض
حليم:أفوت عليك كمان نص ساعة كده
فريد: كمان نص ساعة كده
حليم:طيب ياحبيبي
فريد:مستنيك
حليم: طيب ياحبيبي
فريد:كل سنة وانت طيب
حليم: وانت بالصحة والسلامة .. مع ألف سلامة ياحبيبي وسلم لى على اللى عندك كلهم
فريد:ربنا يخليك
حليم: كل سنة وانتم طيبين جميعا
فريد:وشكرا للإذاعة
حليم: ألف سلامة
فريد: إلى اللقاء
حليم:مع ألف سلامة
فريد:مع السلامة