علّق الفنان والإعلامي مراد مكرم، على الأزمة الدائرة حاليًا بسبب قرار بعض القرى السياحية من نزول المحجبات بـ"البوركيني" في حمامات السباحة، مطالبًا بتخصيص أماكن وشواطئ معينة للمحجبات وأخرى لغير المحجبات.
وقال مكرم عبر صفحته على موقع التواصل الاجتماعي فيس بوك :"مصر كبيرة قوي يا جماعه ،ما هياش اوضه وصاله علشان كل سنه نفس الخناقات و الصعبانيات والكره والشتيمه، مصر فيها آلاف الكيلومترات من الشواطئ الجميله و آلاف بل ملايين حمامات السباحه،ليه ما يتمش تقسيم الشواطئ الي شواطئ للبوركيني و شواطئ للمايوهات العاديه...ايه اللي يمنع يعني بدل صداع كل سنه ده".
وأضاف :"معظم الفنادق بالذات في المنتجعات عندها اكتر من حمام سباحه،تخصص منهم للبوركيني و منهم للمايوه العادي وخلاص...ايه المشكله!!!!! و بعدين لو مكان حاطط لنفسه قواعد ،هو حر ،ليه نروحله طالما لا تنطبق علينا الشروط...لو مكان عام حقك تعترضي بس طالما مكان خاص من حقه يحط القواعد الي شايفها في مصلحة مكانه. ومن حقك تقاطعي".
وتابع :"قصه قصيره حزينه حصلت من كام سنه في شبرا و معظم الشبراويه سمعت عنه.. .احد المطاعم الي اكتشفنا بعد كده ان مالكه اخواني ،كتب علي المحل مطلوب عمال و موظفين و تحتها المسيحيين يمتنعون.... والكلام وصل للبابا شنوده في اجتماعه الاسبوعي....من غير ولا تشنج ولا عصبيه ولا كلام كتير ، البابا رد و قال الي مش عايزنا مش عايزينه......وبكل بساطه عدت بضعة شهور وقفل المطعم لصاحبه الغبي لانه عمل عداوه مع نص سكان شبرا و جزء كبير من النص التاني الي مش متربي علي التفرقه ....و عدت السنين و قفل خالص في مصر تقريبا".
واختتم مراد مكرم :"الحياة فيها من المشاكل الحقيقيه ما يكفينا و زياده....كفايه هري بقي في الموضوع ده ،الحلول موجوده للي عايز يفكر في حل.طبعا الصح ان كل واحد حر ما لم يضر بأحد... بس ده ممكن يبقي حل مؤقت لحين تغيير المزاج العام المصري الي قبول الاختلاف و قبول الآخر دون تعالي من طرف ضد الآخر".
كانت ابنة الدكتور هبه قطب قد أثارت جدلا واسعًا على مواقع التواصل الاجتماعي، بعدما تعرضت للتنمر بسبب ارتدائها «مايوه شرعي» بأحد حمامات السباحة بأحد الأندية الشهيرة بالقاهرة، وظهرت في مقطع فيديو وهي تتحدث عن منعها من نزول حمام السباحة في أحد المنتجعات السياحية الشهيرة في مصر، بسبب أنها كانت ترتدي مايوه للمحجبات.
وبدأت الفتاة في الفيديو باستعراض ما تملكه من ملابس السباحة الخاصة بها “مايوهات” من بكيني وبوركيني، ثم ظهورها وهي تنهار من البكاء بسبب منعها من النزول، قائلة: “رحت مع صاحبتي فندق شهير بالقاهرة، وهناك منعوني من نزول حمامات السباحة بسبب الحجاب، ومايوهات الحجاب”.
وتابعت خلال المقطع وهي تبكي: “المايوهات المفتوحة دي عادي أن أنزل بيها، لكن مايوهات المحجبات لأ، مع أن البكيني اشتريتهم بـ10 و50 دولار، والبوركيني بـ300، و350 دولار”، واستطردت: “أنا عايشة في كندا 10 سنين عمري ما حسيت إني مش مقبولة أو في ضغط وبقالي هنا سنة بس، عادي نشرب نقلع أوكيه ونتكلم لغات تمام، لكن نختار نلبس إيه ولا نعمل إيه لأ، ليه القهر ده، عاوزين تضغطوا علينا لحد ما نقلع”.
