تداول رواد موقع التواصل الاجتماعي فيس بوك، مقطع فيديو قديم من لقاء مع الفنانة صفاء أبو السعود من برنامج "ساعة صفا"، تتحدث فيه الفنانة الراحلة رجاء الجداوي عن خالتها النجمة تحية كاريوكا، حيث تحكي فيه موقفا جمعها بالراحلة التي كانت تحرص على فعل الخير وتعلمها كيفية خدمة الفقراء والتواضع معهم.

وخلال الفيديو، قالت الفنانة الراحلة رجاء الجداوي عن تحية كاريوكا: "كانت الكرم والحنان والاحتواء، احتوتنا واحتوت عيلتها كلها، كانت الإيد اللي بتطبطب على كل فرد في العيلة، الإيد اللي امتدت بالخير لكل فرد في العيلة، الإيد اللي امتدت لكل محتاج في العيلة.. صريحة جدا، عنيفة جدا، هادية جدا، حنونة وصارمة جدا ولو قالت رأي ولو على رقبتها هتتمسك به، وخيرة أوي وكانت كريمة لدرجة البذخ في وقت مكنش عندها".

وواصلت: "كانت لما تحبك تحبك أوي ولما تقلب كان لها قلبات برج الحوت أصله ساعات يقلب ويشوف الدنيا حمراء ولكن ينزل على مفيش هي كانت كده تنزل على مفيش خالص.. كانت تحب الفقير أوي وتحس به أوي كانت تاخدني معاها ساعات الموالد، فمرة رحنا مولد السيدة نفيسة كانت عاملة خيمة وبتأكل الغلابة فرحت قلتلها "فين الكرسي اللي هقعد عليه؟"، قالتلي "هتقعدي على أيه؟!!.. قلتلها كرسي معرفش اتربع في الأرض، قالتلي اترزعي جنبي على الأرض هنا وقطعي العيش يا تقومي تروحي".

وتابعت رجاء: "كانت تركيبة تقعد في القصر تبقى أرقى من اللي في القصر، تقعد على الطبلية تبقى شبه اللي قاعدين على الطبلية تحس بيهم أوي وتحبهم أوي ومكنتش بتتعالى على حد، اتعلمت منها الصدق والكرم في حدود الموجود بس يا ريت أوصلها لأنها ربنا كرمها بنهاية جميلة، كرمها بقفلة ستارة رائعة".

وتوفيت تحية 20 سبتمبر عام 1999 عن عمر يناهز الـ 80 عاماً، إثر تعرضها لجلطه رئوية حادة بعد عودتها من رحله العمرة، وتبنت الفنانة الكبيرة بنت صغيرة عندما كانت في السبعين من عمرها وكانت دائمًا تمازح أصدقائها بقولها أنها "أنجبت وهي في السبعين" وأوصت الفنانة فيفي عبده بأن تتولى رعاية البنت الصغيرة بعد وفاتها.