ردّ المخرج محمد جمال العدل، على الفنانة حلا شيحة، التي تبرأت من أعمالها الفنية وأكّدت أن عودتها إلى التمثيل كانت غلطة ندمت عليها، كما تحدثت عن الفنانين، وأكدت أن فتنة الشهرة هي التي تحركهم.
وقال محمد العدل، عبر صفحته على موقع التواصل الاجتماعي فيسبوك: "يا ريت بس لما تطلقي مترجعيش تقولي عايزة أمثل تاني يا استاذة حلا"، وذلك في إشارة إلى تأثرها بأفكار زوجها الداعية الإسلامي معز مسعود.
وعبر إنستجرام، نشرت حلا صورة تحمل عبارة "مش أنا"، وعلقت عليها بقولها: "أنا اتفاجئت جدا بنزول كليب يجمع مشاهد متفرقة من الفيلم، وفي أيام ذي الحجة أيام مباركة، وخصوصا بعد آخر بوست نزلته ووضحت فيه أنا إيه".
وأضافت: "واتفاجئت أكتر خصوصا بعد وعد تامر حسني ليا، وتأكيده أنه هيحترم رغبتي، وبعض الطلبات اللي طلبتها منه، بكل احترام وود، الصيف اللي فات وأكدلي أنه هيحترم رغبتي".
وتابعت: "إحنا يمكن نجحنا بمقاييس الدنيا، بس صدقوني بمقاييس ربنا إحنا لم ولن ننجح، أنا عارفة ومتاكدة أن زملائي جواهم خير، بس للأسف فتنة الشهرة والنجاح مش بتخلينا نشوف ونقيس الأمور صح، باتكلم من قلبي، الكليب ده ميرضيش ربنا، وأنا عيطت لأني شوفت نفسي في المشاهد دي.. دي كانت زلة، نتيجة ظروف مريت بيها، وكلنا بنغلط، ولازم نغلط علشان إحنا بشر، بس المصيبة إننا بنغفل وبننسى".
وواصلت: "أنا مش حتكسف من حد أنا تبت من المشاهد دي، وهي لا تصح، وأنا غلطت وباصلح، وأهم حاجة إن ربنا يرضى عني، لأن في الآخر ده اللي حينفعنا مش الشهرة ولا النجاح، لأ هو مش نجاح أصلا، علشان النجاح الحقيقي حاجة تانية خالص، إحنا أغلبنا ناسينها إلا القليل منا، الفن لو بيخلينا نبعد عن منهج ربنا، ومنبقاش قدوة لأولادنا يبقى باطل وميبقاش فن".
وأتمت بالقول: "إحنا كلنا عندنا امتحان في الدنيا دي، وحابة أفكرك بالفيديو ده يا تامر، اللي قولت فيه أنا مش باتمنى أموت وأنا مطرب، أنا دايما خايف من كده.. كلام أكيد قولته في لحظة صدق جواك وجوانا كلنا، شوفه تاني يمكن يفكرك أن جواك اكيد في صراع، وأنا وكلنا كلنا بنغلط، بس المهم في الآخر نتدارك الغلط ونصلح.. (إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا).. الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد".
