نشرت الفنانة بدرية طلبة، على صفحتها الشخصية فيسبوك، رسالة دعم للفنان تامر حسني، في ظل الهجوم الذي تعرض له خلال الساعات الماضية من الفنانة حلال شيحة، بطلة فيلمه الأخير "مش أنا".
وقالت بدرية طلبة: "أنا بحب كل زمايلي، وبحسهم إخواتي وأولادي وأساتذتي، وفي النهاية بعد أي شغل بروح على بيتي، وبتابعهم زي المتابع العادي، وتابعت قائلة: أنا بحب أقول كلمة حق في الزملاء القريبين مني، واللي اتعاملت معاهم عن قرب، ولازم أقولها في وقتها، والنهاردة وقت كلمة حق في النجم تامر حسني، اللي باعرفه عن قرب، ومن يوم ما ظهر وأنا بشوف منه مواقف محدش يعرفها ولا يصدقها".
وأكدت: "أد إيه هو بني آدم جبار، لكن يكفي أحكي لكم آخر موقف يوم عملية زميلي وأخويا شريف دسوقي، والمكالمات اللي كل يوم بيتحايل فيها تامر يشيل شريف دسوقى فى عينيه، لكن كان الريس سبقه، ولما ظهرت حالة شبه حالة شريف دسوقي، وتكلفتها عالية وطلبت منه يدخل".
وواصلت بدرية قائلة: " قسما بجلال الله الموضوع ما موضوع فلوس، لكن لو تسمعوا نبرة صوته، وعياطه، وحزنه على الحالة، لما سمع الفويس بتاعها، وهي فرحانة بالطرف الصناعي حتعرفوا من نفسكم البني آدم دا من جواه إيه وأد إيه إنسان مش بتاع شو، غير كل دا كواليسه كلها حب وتقدير واحترام لزمايله، الصغير قبل الكبير، ومنتهى الاحترام والأدب، واستحالة يضايق حد، أو يزعل حد.. ربنا يجبر بخاطرك وتعلا كمان وكمان تستاهل كل الخير" .
الجدير بالذكر كان رد أيضا تامر حسني، على تعليق حلا شيحة قائلا: "للتوضيح بما إنك يا حلا كتبتي بوست، وأشركتي الجمهور الكريم معانا، بدل ما كنتي تكلميني شخصيا، ونتناقش بيني وبينك، فأنا مضطر أرد هنا برضو، أولاً أنا عمري ما وعدتك إن الكليب مش هينزل، دا محصلش أصلاً يا حلا، مش أنا خالص اللي أوعد وأخلف، والحقيقة إني احترمت كلامي معاكي، ووعدتك أشيل مشاهد تانية طلبتيها، وشيلتها بالفعل، وشكرتيني عليها، ولو حابة تفتكري المشاهد اللي اتشالت، بعد إذنك روحي شوفيها في المونتاچ، عند الأستاذ عمرو عاكف، أو كلميه يبعتهالك، كلها موجودة".
وتابع: "وبعدين الفيلم بقاله 3 أسابيع في السينمات، والكليب موجود جوا الفيلم، هو بالنسبالك الحرام، إننا ننزل الكليب على اليوتيوب بس!! إنما الكليب يتشاف جوا السينمات عادي؟؟ منطق غريب فعلاً يا حلا".
