فيما يبدو أنه موسم الحديث عن الدرجات العلمية، بمناسبة ظهور نتيجة الثانوية العامة، شن عدد من رواد مواقع التواصل هجوما على مغني المهرجانات حمو بيكا، بداعي عدم حصوله على قدر من التعليم، ما اعتبره الأخير إهانة تستوجب الرد.
وحرص مطرب المهرجانات، على توجيه رساله لكل من رأى أنهم تنمروا ضده، بعد وصفه بالجاهل، لانقطاعه عن التعليم، موضحًا أن التربية جاءت قبل التعليم.
وشارك "بيكا" عبر حسابه على "فيسبوك"، صورة له، وعلق قائلا: "بتقولوا عني جاهل ومش متعلم.. مع أن دي حاجة أنا عمري ما أنكرتها، ولا حتى خبيتها على الناس.. ومن يوم ما ربنا كرمني واتشهرت وبقي ليا جمهور، بس هرجع وأقولكم تاني إنها حاجة مكنتش بإيدي".
وأضاف: "إنت بقي يا متعلم، التعليم علمك انك تقعد تعاير الناس بعيوبها؟.. التعليم علمك إنك تفضل تتنمر على خلق الله؟.. التعليم علمك إنه مباح ليك الشتيمة في حد هو أقل منك في شيء؟.. أكيد لا.. فمتجيش من ورا شاشة وكيبورد، تعمل فيها عم الناصح.. وإنت أصلا موركش حاجة تعملها!".
وتابع: "أنا متعلمتش ومنولتش الشرف الكبير ده، بس اتعلمت حاجات كتير في الدنيا إنت متعلمتهاش لسه.. اتعلمت احترم الكبير والصغير.. اتعلمت أشقى واتعب من صغري، اتعلمت إني مغلطش في حد.. اتعلمت حاجات كتير جدا في حياتي، إنت عمرك مهتتعلمها طول ما انت باصص للناس..! فكر في كلامك كويس، وكومنتاتك كويس، قبل ما تكتبها.. وقبل ما تقول إنك متعلم افتكر إنه في تربيه وتعليم، يعني التربية قبل التعليم.. صباحكم فل".
وانهالت تعليقات محبي وجمهور حمو بيكا، على حديثه بردود فعل إيجابية، فقال أحدهم: "إنت راجل محترم ياحمو، سيبك من كلام الناس، أهم حاجة اللي جواك، وبالتوفيق لكل مجتهد.. حمو بيكا"، وعلق آخر: "أبو البكبيك الرايق"، وقال ثالث: "أحسنت.. تستاهل الخير يا بيكا".
يذكر أن "بيكا" هاجم مؤخرا صديقه مطرب المهرجانات عمر كمال، عقب حديث الأخير خلال استضافته ببرنامج "الحكاية"، الذي يقدمه الإعلامي عمرو أديب، عن أن بيكا "مبيعرفش يغني هو كاركتر بس"، ليرد حمو بيكا قائلاً: "خلاص سيبت لك الغناء.. نفسي الناس تشوفك وأنت واقف قدام المايك بتسجل أغنية.. توبة إني أغني مع شخصية زيك.. ولا أعمل معاك حاجة تاني".