نشر شاب يدعى أحمد يحيى، تجربته مع الإدمان، موضحًا أنه تعافى منذ ما يقترب من 8 سنوات، بعد تجربة مريرة خسر فيها الكثير على الصعيد الإنساني والمهنة.

وقال الشاب في المنشور الذي تم تداوله على نطاق واسع على موقع التواصل الاجتماعي فيس بوك :"اتمسكت سارق علبه كريم قبل كده من خير زمان خارج بيها وحاطتها في جيبي وبحاسب علي واحده ايس كريم بتاع الامن وقفني وقالي ممكن تطلع اللي في جيبك وما كانش ينفع مطلعهاش علبه كريم حاطتها في جيب البنطلون وخارج وده البرشام تسئلني عملت كده ليه علي الرغم ان كان في جيبي بتاع ٥ الاف جنيه وكنت يوميها لسه قابض ومفرتك الف جنيه كده في الهوا عالضرب والاصطباحات بس عملت كده ليه يمكن كنت ما بحبش اصرف اي فلوس غير عالمخدرات والله المخدرات علمتني السرقه من قبل ما يبقا معاييش فلوس كان كتير بيبقا نفسي في حجات كتير بالرغم من اني بيكون معايا فلوس بس ما بصرفهاش غير عالمخدرات".

وأضاف :"كانت الفلوس اللي معايا ما بتكفيش واستلف عليها واتداين وامد ايدي ولو عايز حاجه اشغل دماغي او انصب او اعمل حوار زي حوار علبه الكريم ده اللي كتبوني فيه تعهد اني ما ادخلش اي فرع من فروع خير زمان تاني".

وتابع يحيى :" الناس اساسا ما كنتش مصدقه طبعا دخلت مكتب الامن وفتشوني وطلعو فلوس وطلعو كارنيه البنك وفيزا وبطاقتي مكتوب فيها حاصل علي ليسانس الناس مابقتش مصدقه كانو بيضربو كف علي كف والنظام عندهم بيقول ان اللي يتقفش بيسرق حاجه يشيل عجز القسم المسروق منه بالكامل يمين شمال معايا اتاكدو اني شارب حاجه وانا اساسا بهوهو عليهم وعميان وفصلوني وكلم حد من اهلك كلم حد يجيلك وانت متزفت شارب حاجه بس لا طبعا انا دماغي مهيألي ان الدماغ فصلت اعمل ايه اعمل ايه روحت نازل علي كوم السمن راكب المترو نازل محطه شبرا الخيمه نزلت خدت عربيه مخصوص تدخلني جوا والدنيا اتأخرت ومفيش حد والله الناس كانت واقفه تتفرج عليا وانا كل اللي في دماغي ان الدماغ فصلت عايز اعمل دماغ جامده ومعايا فلوس فا هضرب بودره احتفالا بالقبض".

وواصل الشاب :"بعد الفيلم اللي كنت فيه يا اخي تم المخدرات علي ام سحلتها علي ام معرفتها بتسحر والله بتسخر البني ادم بتستعبدو والله كان يبقا معايا فلوس قد كده واستحرم اكل حتي بالفلوس ديه انا الفلوس ديه اشرب بيها مخدرات وده كان سبب من الاسباب اللي عطل الخطوبه ماكنتش بعمل اي حاجه غير اني اشرب مخدرات ولا بشيل قرش ولا بركن قرش ولا بشتري حاجه كان لازم الدنيا تخرب كويس والحمد لله اني لسه عايش المخدرات بتستعبد اللي بيشربها من النادر ان حد يقدر يخرج منها سليم "".

واستطرد :"دنيا بتخرب وبيوب بتخرب وعيال بتتشرد وستات بتطلق وبنات بتنحرف ومستقبل بيضيع وحالات انتحار وحالات موت كتير سواء من المخدرات او من الحسره عليه من اهله بيموتو عرغت اهالي كتير ماتت من الزعل علي عيالها وعرفت اللي قتل بسبب انه شارب واللي اتخانق واتحبس واللي مستقبله ضاع بسبب كان بيقضي واتمسك شعوب بتتدمر بسبب مخدرات مفيش جيل جاي بسبب الاستروكس والباودر انقذو عيالكو انقذو نفسكو انقذو بيتكو ومستقبلكو انقذو بلدكو، المخدرات سم، المخدرات بتدمر المخدرات بتموت ".

واختتم يحيى :"احمد يحيي مدمن متعافي بساعد احسن من ما اتساعدت، مبطل بفضل ربنا ٧ سنين و٨ شهور و١٨ يوم ولو انطبقت السما عالارض مش هسكت ولو النجوم طلعت في عز الضهر مش هسكت قد الدنيا والدنيا مش قدي".