تداول عدد من رواد موقع التواصل الاجتماعي فيس بوك، منشورًا كتبه السيناريست أحمد مصطفى، يستغيث فيه لإنقاذ الكومبارس برنسة عبد الغني، أحد أشهر الوجوه الفنية، والتي تعاني من أحوال معيشية متدهورة وفقر مدقع، مطالبا الفنانين بتوفير فرصة عمل تساعدها على الحياة الكريمة.
وقال مصطفى في منشوره تعليقًا على صورة الكومبارس الشهيرة :"الست الجميلة دي اسمها برنسه، ممثله مشهورة وعملت ادوار ثانوية كتير، وكان ليا الشرف أنها طلعت في مشهد من افلامي واتعاملت معاها وشوفت أنها ست طيبة وبتحب الفن بجد، اريت اللي عايزها في اي شغل يراسلني وأنا هديله رقمها."
وأضاف :"ودة حوار معاها يقطع القلب
- حضرتك تعتبري أشهر كومبارس في السينما.. الشغلانه دي متعبه و لا مريحه؟.
= هي متعبه و مريحه بس بنشتغل ساعات كتير
- متعبه من ناحية ايه عشان مثلا النجوم بيبقا ليهم كرفانات و انتوا لا؟.
= اه بالظبط انا اوقات بيبقا ليا اوضه و اوقات بيقعدوني في الحوش كده و ببقا قاعده في اللوكيشن عشان مكنش لوحدي
- انتي في نقابة الممثلين؟
= لا مبيرضوش
- و اجر حضرتك كام؟
= بيوصل 150 جنيه و اوقات بناخد 120 ده ببدل وجبة الاكل وممكن توصل 90 جنيه.. وانا و الله عليا إيجار شهرين وعليا فواتير كهربا مدفعتهاش لاني مشتغلتش رمضان اللي فات خالص ولا حد طلبني بس استغلت دلوقتي و دفعت اللي عليا و كنت و انا قاعده من الشغل بتصل علي ناس يبعتولي فلوس
- بس انتي مستمتعه بالشغلانه؟
= لا مش مستمعه انا شغاله غضب عني عشان ممدش ايدي لحد و عايزه أوجه رساله للرئيس و اقوله انا عايزه يبقا عندي معاش عشان انا تعبت و بشتغل غصب عني والله.. انا اسفه و الله".
يذكر أن برنسة عبد الغني، شاركت في بعض الأعمال، بمجمل 44 عملا، أشهرها فيلم «خالتي فرنسا»، و«كابتن هيما» ومسلسل «سلسال الدم»، وكشفت في حوارات سابقة أنها تعيش وحيدة لم ترزق بأطفال، وتعيش على ما تحصل عليه من مشاركتها في بعض الأعمال التليفزيونية والسينمائية، والتي وصفتها بالـ«ملاليم».
