أعلنت سمر حمزة، بطلة المصارعة المصرية، اعتزالها اللعبة عقب وداع منافسات أولمبياد طوكيو 2020، بعد الخسارة أمام الروسية ناتاليا فروبيفا، في إطار منافسات المصارعة الحرة لوزن 76 كجم، بفوز البطلة الروسية 16 - 12، بعد مباراة مثيرة حُسمت في الجولة الأخيرة، لتتأهل الروسية لربع نهائي دورة الألعاب الأولمبية طوكيو 2020، التي انطلقت يوم الجمعة 23 يوليو، وتستمر منافساتها حتى يوم 8 أغسطس المقبل.

وكتب سمر حمزة عبر حسابها الشخصي على «انستجرام»: «تعالوا نحكي حدوته صغننه كده هتعجبكم سمر حمزه بدأت مصارعه اخر ٢٠١٣ كان عندها 18 سنه لعبت اول بطوله دوليه ليها 2014 كانت بطوله افريقيا اخدت فيها اول ومن بعدها لحد دلوقت اول افريقيا ال عمرها ما حصلت اصلا في المصارعه النسائيه ان بنت تاخد اول باستمرار وبالذات في الميزان 76kg شاركت في بطولات دوليه وحققت نتايج مستمره اول بحر متوسط 2015 تالت جائزه كبري 2016 خامس بطوله بولندا المفتوحه رابع دورت التضامن الإسلامي 2017 تم اختيارها من قارة افريقيا وشاركت في دوري محترفين في الهند اول بحر متوسط 2018 تالت دورت بحر متوسط 2018».

وواصلت: «لحد ما وصلت قبل نهائي في بطولة عالم كبار، وأول بنت مصرية توصل وتحقق خامس عالم كبار، والمركز التامن في بطولة العالم تحت 23 سنة، لحد هنا كان مجهود شخصي مع المدرب، ندخل على الجزء اللي فاضل، تم عقد رعاية من شركة روابط من 2019، شاركت في بطولة الجايزة وحصلت على برونز، تالت دورة الألعاب الأفريقية، و2020 بح فاضية مفيهاش غير أفريقيا».

 

وأشارت: «في 2021 تاني بطولة التصنيف العالمي، المركز الأول في البطوله المؤهلة واتأهلت للأولمبياد، الميدالية البرونز في بطولة دانكلوف، الميدالية الدهب في بطولة الجايزة الكبرى، الميدالية الدهب في بطوله سارساري إيطاليا، كام معسكر سمر طلعته في عمرها اللي من 2013 لحد دلوقت؟، 4 معسكرات، مدة المعسكر قد إيه؟، 10 أيام، نشوف بقي اللي بيلعبوا معانا!!!!!!!! وعمرهم في اللعبة والفكر والروح بتاعة المنظومة؟؟؟، أنا كسمر حمزة فخورة جدا بالمصارعة النسائية في مصر».

 

وتابعت حديثها قائلة: «سعيدة إن المصارعة النسائية أصبحت على الخريطة العالمية، أنا ابتديت ألعب مصارعة من 8 سنين، شوفت إنجازات كابتن كرم جابر ومن وقتها قررت أكون لاعبة مصارعة زيه، لما ألعب من 8 سنين وفي إمكانات محدودة، ومتربتش على فكر صناعة بطل أولمبي، وأقدر أوصل لتصدر أفريقيا وخامس عالم كبار وبطولات دولية ومصنفة، يبقى دة إنجاز لكل بنت بتفكر تلعب مصارعة في مصر، أنا لعبت مصارعة بالصدفة، وحلمت أكون بطلة أولمبية، واشتغلت على نفسي كتير واستحملت تدريبات شاقة ونقد وتكسير عزيمة عشان أوصل لما وصلت إليه، يمكن أكون متربتش على ثقافة الفوز، بس أنا مقصرتش واستغليت كل فرصة أتيحت ليا، شجعوا المصارعة النسائية عشان نربي جيل من البنات الصغيرين بفكر جديد وإمكانات أفضل وثقافة مختلفة، الرياضة مش بس ميدالية، دي سنين طويلة من الكفاح والتعب».

 

واختتمت: «للمعلومة اللاعب وظيفته في الحياة التدريب فقط، ليس القيام بدور الأشخاص المسؤولين عن مسيرتة الرياضية، شكرا لكل حد وقف جنبي، شكرا مدربي العظيم، شكرا زمايلي اللي اتمرنوا معايا، ومن هنا بعلن إني بكتفي، شكرا للتجربة علمتني كتير».

سمر حمزة مواليد عام 1995 وتأهلت إلى أولمبياد طوكيو من خلال الدورة المؤهلة التى أقيمت بتونس الشهر الماضى، وسبق لها المشاركة فى أولمبياد ريو دى جانيرو 2016، وحلّت في المركز الـ12 في الترتيب النهائي من منافسات فئة 75 كجم.

وحققت سمر حمزة عدة بطولات وألقاب منها المركز الأول إفريقيا 8 مرات، والمركز 12 في أولمبياد «ريو دي جانيرو 2016»، وخامس بطولة بولندا المفتوحة 2016، والثالث بدورة الألعاب الإفريقية، وأول دورة بحر متوسط 2015، وكذلك ببطولة البحر المتوسط 2018 وبرونزية  دورة المتوسط 2019، وبرونزيتين ببطولة أسبانيا، وخامس عالم للكبار 2018، والثامن عالميا تحت 23 عاما 2018، ورابع دورة التضامن الإسلامي 2017، وبرونزية بطولة «نيكولا بتروف» 2021، فضلا عن ذهبية الجائزة الكبرى فى روسيا مايو الماضى .

وخضعت اللاعبة ومدربها لمسحة أول أمس بعد ظهور بعض الأعراض عليهما، من زكام وسعال، فتم إجراء مسحة عاجلة ظهرت نتيجتها بعد مرور 3 ساعات فقط، وتم التأكد من سلامتهما.