أعرب الفنان تامر حسني عن سعادته الكبيرة، لاستعانة بعض الشباب الخريجين بأعماله، من أجل بث الحماس في مشروعاتهم، لافتًا إلى أنه عند أدائه لهذه الأغاني كان يود أن يشعر الجمهور بها ويتفاعل معها، ولا تقتصر على سماعها فقط.

ونشر تامر حسني عبر صفحتها الرسمية بموقع تبادل الصور والفيديوهات "إنستجرام"، فيديو لمجموعة من الشباب في أثناء تخرجهم، وعلق عليها قائلًا: "فرحة عمري لما شباب عظيم من شباب مصر الواعد يستوحي مشروع تخرجه أو يقتدي بأغنية ليا زي الموضوع فيك أو مش تمثال أو قد التحدي".

وأضاف تامر حسني: "والله والله وأنا بعمل الأغاني دي كانت دي نيتي أنها تتحس ويتعمل بيها مش تتسمع بس والحمدلله اللي طلبته من ربنا حصل عشان اللي بيطلع من القلب بيوصل للقلب.. مبروك شباب مصر العظيم.. يا رب حياة جديدة كلها خير ونجاح وطموح لا ينقطع.. ربنا يفرح أهاليكم بيكم أنتوا أملنا وأنتوا النماذج المشرفة الحقيقية".

وتابع تامر حسني: "الحقيقة اتطلب مني كلمة أقولها للشباب اللي بيتخرجوا بس أنا كدا كدا كنت هكتب لكل شبابنا مش اللي بيتخرج بس بكتب لينا كلنا.. أكتروا وخلوا أيديكم في أيد بعض.. هفضل أقولها مفيش حل غير أنك تنجح لما بتنجح كل الناس بتقدرك واللي مكانش فاهمك ومصدقك بيصدقك وبيحترمك.. لما بتنجح بتبقى قوي ومرغوب فيك".

واستطرد تامر حسني: "لما بتنجح ربنا بيحبك وبيستخدمك عشان تنفع غيرك.. يا شباب يا جميل متبخلوش على بعض بالنصيحة والكلمة الطيبة وفعل الخير.. أي فكر شرير مهما كان كتير لازم يلاقي قصاده فكر خير أكبر و أكتر عشان ننهض ببلدنا ونسلمها لأولادنا أحسن من ما كانت في زمنا هي دي رسالتنا كبشر وكل حد فينا مادام بيصحى من النوم بيلاقي نفسه لسه عايش لازم يعرف أنه لسه مطلوب منه مهام في الدنيا لازم يعملها و يفرح أن ربنا مديله وقت وعمر يحقق فيه ومهما كانت الصعاب أنت لازم تبقى بطل قصة حياتك".

وأنهى تامر حسني حديثه: "عمركم سمعتوا عن بطل معندوش معاناة!!؟.. مستحيل.. المعاناة دي اللي هتصنع منك راجل قد المسؤولية وهتبقى بسببها بطل في قصة حياتك ومش عيب تبدأ من الصفر ياما ناس بدأت من تحت الصفر ووصلوا لأكتر من أحلامهم أنتوا كمان هتوصلوا.. ثقوا في نفسكوا وخلوا يقينكم بالله أقوى شيء.. صراع الدنيا صراع يقيني.. صدق نفسك أنت تقدر وأنتي تقدري.. يعلم ربنا أنا بحبكوا قد أيه ونفسي أشوف شباب الوطن كله ناجح وفرحان ومفرح أهله مبروك يا أمل مصر".

 

 

 

 

View this post on Instagram

 

 

 

 

 

 

 

 

 

 

 

A post shared by Tamer Hosny (@tamerhosny)