قال عمر المهندس حفيد الفنان فؤاد المهندس في مداخلة هاتفية لبرنامج " من امبارح للنهاردة الذي تقدمه الإعلامية همسة إمام على راديو ميجا اف ام:" إن جدى ترك أثر واسم كبير جدا سيظل خالدا لكل الأجيال، وعشت معه فى الزمالك إحنا كنا في الدور الثامن وهو فى السابع، وفضلت معاه لحد ما وصلت ١٦ سنة، وتوفي. وأضاف: "مسرحية "سك على بناتك" هى أكتر حاجة بتفرج عليها كل يوم من غير ما أمل، وشايف أن جدى كان عنده إمكانيات أكبر لم يتم استغلالها، وكنت مساعد مخرج مع شريف عرفة لمدة خمس سنوات وعملت فيهم كذا حاجة منها تامر وشوقية والجزيرة". وتابع: "بحب أخرج أكتر من إنى أمثل، وورثت اسم كبير جدا، كل حد يتعرف عليا يبتسم تلقائى، أظن إنى أشبه جدى فى حبي فى التركيز في الشغل وحبى للفن".

 واختتم: "كنت طفل فضولى وبسأل جدى كتير قوى، يعنى مثلا في فيلم اخطر رجل فى العالم، سألته إزاى طلعت بشخصين، وضربتوا بعض وكده، وهو عمره ما بخل بمعلومة, كان صارم جدا، وبيهتم بالمواعيد فى الشغل، وكمان برنامجه اليومى، وكان عنده الأكل بميعاد والقهوة كمان".