وقفت الزوجة الشابة أمام قاضي محكمة الأسرة يكسو ملامحها الحزن، طالبة الخلع من زوجها بعد أن حاولت معه بكل الطرق وطلبت منه تغيير بعض عاداته التي كانت سببا في نفورها منه.

وقالت للقاضي بلهجة حزينة: "أنا وزوجي متجوزين من سنة، في الأول كان مهتم شوية بنفسه ومكنتش بلاحظ عليه الريحة الوحشة دي، مع أني كنت عارفة أنه شغال في الصرف الصحي بس وافقت عليه عشان قولت راجل يحمينى لكن بعد الجواز بفترة قصيرة كان لسه مهتم بنظافة نفسه جدا لحد ما بدأنا ناخد على بعض وبقي بيكسل يستحمي بالشهور ويقولي أصلي راجع تعبان أصلا وأنا اتعودت علي الريحة وعايز ياكل وينام بنفس اللبس اللي كان شغال بيه".

وأضافت: "فضلت شهور بحاول أتحمل الوضع لحد ما وصلت لمرحلة أني مبقيتش قادرة أقعد معاه في بيت واحد ريحته مسيطرة على الشقة كلها وبتكسف لما حد يبقي عندنا ويكون شامم الريحة دي،  ووصل بيا الحال في الفترة الأخيرة أنه مكنتش بطيق أنه يلمسني أو يقرب مني وبدأت أتهرب منه عشان يبعد عني لكنه ظل في إلحاحه لحد ما قولت له أنت لو فضلت بريحتك دي مش قاعدالك في البيت، ساعتها بدأ يراضيني وكان يستحمى مرة ويفضل بعدها بالشهر ما يحولش أنه يفكر يعملها تاني، لحد ما وصل بيا الأمر أني جيت للمحكمة عشان أخلعه".