تحدث الفنان حسن يوسف عن ذكرياته مع الفنان توفيق الدقن وعبد المنعم مدبولي خلال ندوته اليوم في قصر السينما.

وقال حسن يوسف، توفيق الدقن كان بيرجع مونون ومن أول الشارع بيشتم الشارع كله لغاية ما يوصل البيت يشتم عياله، وفي مرة كان سايق عربية ومروح وفجأة صحي لقى نفسه في باترينة عمر أفندي في شارع عبد العزيز، وصوروه وقالوله عايزين نوريلك حاجة ووروله فيديو وهو راجع.

وتابع : وأقسم إنه مش هيحط خمرة في بقه وكان صادق في حلفانه، وأولاده كانوا السبب وبقى إنسان أطيب بكتير لما بطل الحكاية دي، وتفرغ لشغله أكتر وبقى نجم من نجوم المسرح. كما تحدث عن الفنان عبد المنعم مدبولي، قائلا: «كنت بشتغل مع عبد المنعم مدبولي في مسرحية، وشتمني على المسرح وقالي يا ابن الكلب، وكان أول فنان يشتم على المسرح».

بينما تحدث عن المخرج حلمي رفلة قائلا:«بعتبره الأب الروحي للوسط الفني، وكان بيحافظ على علاقته مع كل الوسط، وبيراعى العلاقات الزوجية، وبيوفق بين أي فنانين، ولو أنا وشمس بنتخانق ييجي يصلح بينا».