كشفت رشا شقيقة الفنان الراحل أحمد سامي العدل، تفاصيل اللحظات الأخيرة في حياته.
وروت رشا أحمد سامي العدل، لحظاته الأخيرة، عبر حسابها الشخصي لموقع التواصل الاجتماعي "فيسبوك": "قاعدين علي البحر في دهب في ساعة غروب بنضحك و بنعيط سوا و نشتكي لبعض قد أيه أبونا وحشنا و قد أيه الحياة من غيره صعبة فضفضنا لبعض و وعدنا بعض بحاجات كتير... رجع القاهرة علي وعد بلقاء قريب نتجمع فيه تاني".
وتابعت رشا: "جيه اللقاء بعد مكالمة تليفون الحقي أخوكي تعبان في المستشفي جريت عليه لقيت التعب و الألم زايدين علي مش عارف يتنفس و كلامه بصعوبه قعدت اكلمه و اضحكه و أحاول أهون عليه شوية و أسيبه يرتاح شوية".
واكملت: "وفي عز محاولاتي نقله لمستشفي تانية، نبض قلبه وقف لثواني قدامي، إتخضيت الدكاترة طمنوني وقالوا مفيش حاجة اهو زي الفل بس، وقالي قلبي وجعني و لقيتني بقول له عايزاك تسبح و تقول الشهادة معايا وتفضل تقول كل القرآن اللي أنت حافظه".
وتابعت رشا: "يدوب لفيت ظهرى ولسة هاخرج اشوف موضوع الإسعاف و نقله لقيت دكاترة وممرضين في كل حتة حوالين احمد بيحاولوا ينعشوه ٣٨ دقيقة، محاولات و أنا واقفة قدامه قلبي بيتقطع و روحي أنا بتطلع مني ماسكة في خيط امل من الدخان إتقطع ب آخر نفس منهط.. راح أحمد.. اخويا الصغير الطيب الحنين الهادي".
ورحل صباح أمس يوم السبت عن عالمنا الفنان والمخرج الشاب أحمد سامي العدل، وكانت بمثابة صدمة لكل أقاربه والوسط الفني.
يذكر أن الراحل أحمد سامي العدل شارك في العديد من الأعمال الفنية، بالإضافة إلى العمل في شركة العدل جروب.