بعد النجاح الكبير الذي حققه فى مسلسل "النص"، برز الفنان ميشيل ميلاد كأحد الأسماء اللامعة في العمل، حيث قدم شخصية إسماعيل بأسلوب فريد جمع بين الكوميديا والتراجيديا، مما جعله محط أنظار الجمهور والنقاد.
حاورت "بوابة دار الهلال"، الفنان ميشيل ميلاد، وتحدث عن كواليس التصوير مسلسل النص ،وكيفية تحضيره للدور، خاصةً أن المسلسل مستوحى من "مذكرات نشّال"، كما يتحدث عن الصعوبات التي واجهها في تقمص شخصية تنتمي إلى حقبة الثلاثينيات، والتحديات التي فرضتها اللغة والمفردات المستخدمة آنذاك، كما يلمح إلى مشروعاته القادمة، وعلى رأسها الجزء الثاني من المسلسل النص الذي يبدأ به بعد العيد
ما الذي جذبك لشخصية إسماعيل في مسلسل "النص"؟
تركيبه شخصية إسماعيل جديدة عليا من حيث الشكل والمضمون والضحك وأكثر شئ شدني بردو فكرة العصر أن هو في عصر الثلاثينات وأنا بحب العصر دا جدا كان شئ ظريف أشارك في حاجة عاملة كدا والأحداث بدور في الوقت دا فـ أنا اشتريت بصراحة كان الموضوع كويس إن أنا عملت دا.
ماذا عن كواليس مسلسل النص؟
الكواليس ممتعة جدا جدا وكلها ضحك وشغل وتركيز وكان حاجة في منتهى الجمال وعلى رأسهم طبعا أستاذ أحمد أمين الناس كلها بتحبه وهو بيحب كل الناس وراجل خلوق ومهني ومحترف ودمه خفيف وفي كل المميزات اللي بيتمناها أي ممثل تكون موجودة في النجم اللي شغال معاه
مسلسل النص مبني على أحداث تاريخية ومتوحاة من كتاب "مذكرات نشال".. هل قرأت الكتاب في تحضيرات الشخصية؟
قريت جزء كبير من الكتاب بس هي شخصية إسماعيل مش موجودة في الكتاب نفسه بس كانت موجودة في الوقت دا مكنش بيعمل طبعا اللي بيعمله إسماعيل بس هو كان أول واحد اخترع محطة راديو محلية فـ منها استلهموا فكرة شخصية إسماعيل، قريت من الكتاب جزء كبير علشان أعرف المفردات اللي كانت بتستخدم في الوقت دا والكلمات والجمل اللي طبعا هتكون مختلفة عن الوقت الحالي
ما هي الصعوبات التي واجهتك في تحضير الشخصية؟
أكثر الصعوبات هو أي اللي يتقال وأي اللي ميتقالش من حيث الألفاظ بالنسبة لتحضير قبل التصوير فكان لازم أجمع زي قاموس كدا خاص بالفترة دي في الكلمات وحاجات اللي عاملة كدا وشوفت أفلام وثائقية والأفلام القديمة اللي كانت موجودة في الفترة دي أفلام نجيب الريحاني وعلي الكسار والناس الجميلة دي كلها، دي أكثر حاجة كان مهم أن أنا أكون مجمعها في الوقت دا
هل كنت متوقع نجاح العمل الكبير؟
بالنسبة للمسلسل في معطيات كدا بتقولك أن الدنيا ممكن تروح فين أولا الطاقم كله مجتهد جدا وملتزم جدا ومركز جدا فـ الحاجات دي خلتني أقول أن في مسلسل قوي هيكون موجود في إدارة مظبوطة مع أستاذ حسام علي، عارف يدير المشروع بشكل قوي جدا معانا فنان كبير مركز جدا في الورق ومركزين والممثلين كلهم فنانين مهمين وكلهم بذلوا مجهود كبير فـ كل دي معطيات بتقول أن في عمل محترم هيتعمل
كيف تلقيت ردود أفعال الجمهور على نجاح شخصية إسماعيل الكبير؟
كنت متخيل النجاح دا لكن نجاح شخصية إسماعيل جه ازيد من توقعاتي الحمدلله يارب ربنا نور بشكل كبير على الشخصية فخلى الناس تتقبل بشكل كبير يعني، بالنسبة لـ جملة "أنا تعبان تعب، أنا مظلوم ظلم" كنت حاسس أنها هتعمل رد كويس وخصوصا أن هي بتتقال في كل الحلقات ودي كانت فكرة أستاذ أحمد أمين إن هي تتقال في كل الحلقات قبل الظهور اللي هو يعمل تشويق لناس هو مين اللي عنده مظلمه دا فانا كنت متخيل أنها هتعمل رد الفعل اللطيف اللي حصل دا والحمدلله دا حصل يعني
ماذا عن أعمالك في الفترة القادمة؟
هنستكمل بعد العيد الجزء الثاني من مسلسل النص في حاجات، في كلام على مشروعات أخري لكن لسه في قيد التحضير.