أعرب الموسيقار الكبير صلاح الشرنوبي عن حزنه العميق بعد وفاة نجله الأكبر محمد، موضحًا أنهم بذلوا جهدًا كبيرًا لإنقاذه من الحمى، لكنه فارق الحياة رغم كل المحاولات.
وتحدث صلاح الشرنوبي في تصريحات تليفزيونية، عن تفاصيل هذه الفترة الصعبة، قائلاً: "كان شعلة نشاط وحيوية، هو ابني الأكبر وكان سند ليا وكان المستشار الأول بالنسبة ليا، كل صغيرة وكبيرة برجع له فيها، كان ذكي جدًا ومهندس وأكتر حد كان حابب الامتداد بتاعي أنا كهندسة ومزيكا، كل تفصيلة منذ بدأت وحتى وفاته كان عارفها عني، كان موسوعة كنت معتمد عليه في امتداد شرنوبي، طبعًا ربنا يخليلي ولادي رامي وزياد وأحمد".
وتابع: "محمد رحمه الله، جاتله فجأة سخونية ورعشة وكان لسه جاي من عمرة قبل رمضان على طول، وكان حضر معايا حدثين وبعد كده راح عمرة مع أخواته ووالدته، وفجأة في شهر 4 حصله سخونية ورعشة وعرضناه على دكاترة وهو من النوع اللي مبيحبش الدكاترة، وبدأ يتحرك مع والدته وأخواته علشان يروح للدكاترة، وكان بياخد مضادات حيوية واتعرض على دكاترة في تخصصات مختلفة وقالوا مفيش مناعة وفيه فيروس وحاولنا نسعفه بأي شكل، وبعد ما احتاروا كل الأطباء قالوا نروح مستشفى الحميات علشان يبحثوا عن سبب الحمى دي، ولكن الفيروس كان متمكن منه ولكن دي حكمة ربنا وقدر الله وماشاء فعل".
وأضاف الشرنوبي: "الموقف صعب وربنا ما يوري حد، وده قدر لا أسلم ليه ولا حول ولا قوة إلا بالله العلي العظيم، ويوميًا بقرأ أشياء عن أولادنا وأصحابنا ميعزوش على ربنا الخالق، وبنصح الناس بالاهتمام بالصحة إلا الأقدار اللي لا نملك فيها أي شيء".