يواصل النجم أحمد زعيم تثبيت مكانته الفنية من خلال أعماله الغنائية المميزة التي بدأها مع نهاية العام الماضي، حيث طرح أغنيته الجديدة "مابكدبش"، وهي أغنية رومانسية من ألحانه وإنتاجه، وكلمات الشاعر محمد عاطف، وتوزيع وميكس وماستر عمرو الخضري، وتم تنفيذها وإخراجها بتقنية الذكاء الاصطناعي (AI) على يد المخرج محمد شحاتة.
كشف زعيم عن مفاجأة تتعلق بالأغنية، قائلاً: "الأغنية دي ليها معزة خاصة جدًا عندي، كتبها الشاعر محمد عاطف بصدق وإحساس عميق، ولما خلصت تلحينها كنت عايز الفنانة شيرين عبد الوهاب تغنيها، خصوصًا بعد تعاونّا قبل كده في أغنيتي «هو ده» و«ابتسمت». وبالفعل شيرين سمعتها وأعجبت بيها جدًا وقالت لي: الأغنية دي محدش هيغنيها غيري."
وأضاف: "لكن بعد فترة طويلة، الأغنية فضلت زي ما هي من غير أي خطوة جديدة، وكنت بسمعها دايمًا مع نفسي، خصوصًا جملة «حلمت أنا بيك» اللي أثرت فيّ جدًا، لأنها بتحكي حاجة حصلتلي فعلاً، لأني اتجوزت زوجتي بعد ما حلمت بيها، رغم إننا ماكنّاش نعرف بعض.. فكان القدر والنصيب من خلال حلم."
ويتابع: "اتكلمت مع الشاعر محمد عاطف وقلت له نفسي أغنيها، فكلّم شيرين وقالها قد إيه أنا مرتبط بالأغنية، وهي وافقت بكل حب، وبدأت أشتغل عليها مع الموزع عمرو الخضري اللي أضاف لها لمسة موسيقية جميلة. متأكد إنها هتنجح جدًا مع الجمهور."
وعبر أحمد زعيم عن سعادته بحصوله على جائزة أفضل مطرب شاب في مهرجان دير جيست 2025 عن أغنيته "حب تاني"، كلمات محمد يونس، وألحان أحمد زعيم، وتوزيع أحمد عبد السلام، وإخراج أحمد علاء الجندي، كما أعرب عن فخره بنجاح أغنيته "هد حيل"، التي تعاون فيها مع محمد يونس وأحمد المغربي وعمر أيمن.
وأشار إلى أنه يستعد لعدد من الأعمال القادمة مع نجوم كبار، قائلًا: "الفترة الجاية إن شاء الله هتلاقوني مع الفنانة إليسا، والفنان هاني شاكر، ورحمة رياض، ووائل جسار، وغيرهم.. ومش هغيب تاني، كمان فيه أعمال درامية هتسمعوا صوتي فيها قريب."
وتقول كلمات أغنية "مابكدبش":
مابكدبش أما بفضل أقول
حلمت أنا بيك سنين ياما
أنا في أحضان عيونك دول
من الدنيا دي بتحامى
بدأت أتأكد إن حياتي من غيرك ولا تتعاش
دي فرحة قلبي ما لقيتهاش إلا معاك
ماكنتش أعرف إن الحب بيعلي كده الإحساس
نسيت الدنيا دي والناس وأنا وياك
حبيبي إنت ابتسامتك عيد
وهمساتك بموت فيها
غلاوتك كل لحظة تزيد
عن اللحظة اللي قبليها