نعى المؤلف سيد بشير نجله سليم، الذي رحل عن عالمنا أمس إثر تعرضه لأزمة صحية، وذلك من خلال منشور مؤثر عبر حسابه الشخصي على موقع التواصل الاجتماعي «فيسبوك».
وكتب سيد بشير في نعيه لنجله: «سولي حبيبي، عارف إنك خفيت الحمد لله ومابقتش تعبان زي الفترة اللي فاتت، وعارف ومتأكد إنك أحسن وزمانك قاعد دلوقتي بتلعب مع تيتا، بس يا ابني والله غصب عني الفراق، لعنة زيه زي المحبة لعنة ما تنتهيش».
وأضاف: «حقك عليا يا حبيبي.. كان نفسي ننزل نصلي الجمعة سوا، وننزل نقعد ع القهوة مع بعض زي الصحاب، وكان نفسي نتخانق كتير قوي لما تكبر، وكان نفسي نضحك أكتر وأنا قفشك وأنت عامل نفسك ناصح».
وتابع: «كنت عايز أشوف البت اللي هتحبها، كنت عايز أديك كل الكتب اللي في مكتبتي».
واستكمل سيد بشير حديثه عن أحلامه التي كان يتمنى تحقيقها مع نجله الراحل، قائلًا: «كنت بتخيلك كتير وأنت بتسندني وأنا عجوز.. عجزت يا ابني وأنت مابقتش معايا».
واختتم رسالته قائلًا: «بس فرحان لك يا حبيبي إنك خفيت الحمد لله، وبقيت في الجنة، ربنا يصبّرني على بعدك يا حبيبي لحد ما أجي لك، ويارب يكون قريب، سلم على تيتا وعلى كل الحبايب واللقاء قريب إن شاء الله».