أعرب الفنان القدير علي الحجار عن سعادته الغامرة بتصويت أخيه رأفت الحجار في دبي بالإمارات، موضحًا أن هناك كثافة في الناخبين المشاركين بالإدلاء بأصواتهم في الانتخابات الرئاسية.

ونشر الحجار عبر صفحته بموقع التواصل الاجتماعي "فيس بوك" صورة لأخيه وهو أمام إحدى لجان الانتخابات وعلق قائلاً: "أخويا رأفت الحجار عايش فى دبى من سنين طويلة ودايما بيوحشنا وجوده في وسطنا أنا وأحمد لأنه بييجى مصر مرة فى السنة".

وتابع: "وأسعدنا في الأسابيع اللى فاتت أربع مرات.. مرة.. لما غنى معانا في أغنية ليالى الفرح اللى كتبها الصديق الشاعر سالم الشهباني ولحنها أخويا أحمد الحجار علشان فرح أحمد ابني غنى في دبي وبعتلنا تراك صوته من هناك والمرة التانية لما عمل لنا مفاجأة وجه مصر علشان يحضر الفرح وبالمناسبة الأغنية دي غنى فيها أحمد العريس وأخواته وأعمامه وأبوه اللي هوه انا يعنى.. وإن شاء الله حتسمعوها قريب".

وواصل: "والمرة التالتة إنه بعتلى الصورة دى من شوية علشان يقول لنا إنه راح القنصلية المصرية فى دبى يدلى بصوته فى انتخابات الرئاسة ولما كلمته علشان اسأله إذا كان عدد المصريين اللى راحوا ينتخبوا كان عدد كويس واللى أسعدنى للمرة الرابعة بان المصريين اللى أدلوا بأصواتهم كانوا كتير وكانوا واقفين بيغنوا ويهتفوا باسم مصر. الحمد لله لسه المصريين بخير".