ميريهان حسين: «تحية لإليسا.. تحية للأقوياء الذين لا يظهرون قوتهم لنا»

وجهت الفنانة ميريهان حسين، رسالة دعم وتقدير للمطربة اللبنانية إليسا، عبر حسابها الشخصي على موقع الصور العالمي "إنستجرام"، بعد أن كشفت الأخيرة عن فيديو كليب بعنوان "إلى كل اللي بيحبوني" يرصد معاناتها ورحلة انتصارها على مرض سرطان الثدي.

وقالت حسين: "كان نفسي من فترة أقول للناس ارحموا الفنانين شوية.. الفنانين والفنانات مش زي مانتوا فاكرينهم بيتدلعوا ويكسبوا ملايين لأ.. انتو ما تعرفوش التعب والظروف القاسية جدا اللي ممكن تعدي على فنان ومايقدرش يعبر عنها ولا يملا الدنيا شكوى زي أي شخص عادي.. أبسط حقوقه فإنه يعبر عن ألمه ما يقدرش يصرح بيه.. لأنه هيفتح على نفسه أبواب حكم الناس القاسية اللي مابترحمش".

وتابعت "حسين":" واللي هتألف فوق الحكاية الحقيقية مليون حكاية كدب.. أنا واحدة من الناس اللي سكتوا على حقهم وتحملت اللي ميتحملوش جبل عشان مسمعش حكايات ظالمة وتعليقات وإشاعات مؤذية ليّ ولأهلي.. إليسا خبت مرضها وقاومته لحد ما تغلبت عليه وأعلنت عنه بعد ما شفيت".

أكملت: "ده مثال للصراع اللي ممكن تعيشه فنانة أو شخصية عامة بعيد عن الأضواء وتظهر للأضواء بوجه آخر مشرق ورائع.. وكمان تشوفه بيشتغل وبينجح وأنت متعرفش الحالة اللي كان فيها وهو بيقدم عمل فني يسعد بيه جمهوره".

واختتمت حديثها قائلة: "أتمنى أن الناس تعرف أن الفنان إنسان وممكن يكون بيعاني معاناة أنت لا تعلم عنها شيء وبينتقده فقط وتقسى عليه تحلل وتحرم وتدخله النار وأنت قاعد مكانك بكلمتين على موبايل في إيدك وتنسج قصص وإشاعات وأنت لا تعلم إلا أقل أقل القليل عنه.. تحية لإليسا.. تحية للأقوياء الذين لا يظهرون قوتهم لنا ولكنهم يخوضون معارك لا نعرف عنها شيئا".