شغلت ظاهرة التحرش الجنسي، اهتمام رواد مواقع التواصل الاجتماعي خلال الساعات الماضية، حيث تداول النشطاء هاشتاج #التحرش_زاد_ليه، لاستعراض أسباب زيادة هذه الظاهرة خلال الفترة الأخيرة، بعد تكرار وقائع التحرش الجنسي بالفتيات.
واستعرض المشاركون في هذا الهاشتاج، الأسباب التي أدت لزيادة ظاهرة التحرش من وجهة نظرهم، فمنهم من قال إنها أسباب دينية متمثلة في البعد عن الدين وعدم غض البصر، ومنهم من فسرها بأسباب اجتماعية مثل تراجع دور الأسرة وغياب التربية والتقويم، فيما قال البعض أن عدم تطبيق القانون باحزم واتخاذ عقوبات رادعة ضد المتحرشين أدى لزيادة التحرش.
وقال أحد المشاركين، إننا "عندنا كوارث أخلاقية ومفاهيم فاسدة، أصبح كتير من الناس بتربي ولادها عليها وتبريرات ابنى مدردح مش خجول ومقفول واللى مش عاجبه وتبجيح، واللى يبقوا فخورين إن ابنهم من وهو فى ابتدائى وهو بيعرف يقول كلمات تحرش وتلميح ويمكن تصريح ويمكن يعمل أكتر #التحرش_زاد_ليه".
فيما نشر آخر تغريدة، قائلا إن السبب هو غياب قوانين ردع المتحرشين، وقال آخر: "لإنهم سايبين الحمير وبتشطروا على البردعة، إذا البنت لبسها فاضح وقليلة حياء، أنت خلي عندك أدب والتزم بدينك وغض بصرك لا تحطوا الخطأ على البنت وتنسون الخروف اللي عينه زايقة".
فيما عدد أحد المشاركين أسباب زيادة التحرش، ومنها "اللاوعي اللي بقينا فيه، إن الجواز غلي لدرجة إنه بقا تجارة، غياب الأهل عن التربية سواء للولد أو البنت، قلة دين وإيمان عن المجتمع نفسه، كثره حالات الطلاق، عدم وجود قانون رادع للتحرش، انتشار المخدرات وزيادة أنواعها اللي بتخلي الفرد غايب عن وعيه #التحرش_زاد_ليه".
وقال مشارك آخر، إنه: "أولا هو موضوع أخلاق الشخص يعنى يكون بيخاف ربنا وعارف إن ده حرام، ثانيا تربية الأهل لأن الشخص اللى يعمل كده أهله مخدوش أي جزء من وقتهم يربوه فيها وسابوه للمجتمع المريض هو اللى يتكفل بالتربية #التحرش_زاد_ليه".
فيما فسر آخر زيادة التحرش بسبب ما وصفه بـ"المسلسلات والأفلام الهابطة اللى مصورة البنت سلعة رخيصة"، وقال أحد المغردين، إن التحرش زاد بسبب مجموعة أسباب ، أهمها في رأيه "زيادة مشاهدة المواقع الإباحية اللي بتخلي البنت في مخ الشاب مجرد أداة للمتعة،. ٢- تصدير التحرش كعمل مثير للكوميديا في الأفلام والمسلسلات وحتى الإعلانات ودا بيخلق ارتباط شرطي بين التحرش والكوميديا، ٣- عدم غض البصر".
وقال آخر: "للأسف البعد عن ربنا وقلة التربية أو الانعدام بيصدر لينا كل يوم خنازير فى الشارع، وعشان فى ناس بتتكلم على لبس البنت فى الشارع والملامة دى ليهم مع إن المتحرش ده ولا فارق معاه محجبة من سايبة شعرها من طفلة ربنا يعفينا".