دعا الفنان أمير عيد، عضو فريق "كايروكي"، عبر صفحته الرسمية بموقع التواصل الاجتماعي "فيسبوك"، إلى اتخاذ الإجراءات اللازمة للحد من الإصابة بفيروس كورونا المستجد، وذلك بعد زيادة الأعداد على مدار الأيام الماضية.

وقال: "قبل حفل النهاردة أحب أقول إن أنا ممكن أكون غلطان ومقرأتش الأمور بالشكل السليم من الأول، خصوصا أن وقت الاتفاق على الحفل كانت الظروف مختلفة، والأمور مستقرة أكثر من دلوقتي، وبيتعمل حفلات، فأي حد عنده الحق يعترض على إقامه حفل كايروكي، مش هصادر رأيكم".

وأضاف: "الموضوع نسبي هناك من يؤيد استمرار الحياة مع الوقاية، علشان الشغل والحال يمشي، وهناك من يؤيد العكس، وقرار الإلغاء أو التأجيل حاليا، من أصعب ما يكون بعد بيع التذاكر في أول يوم نزلت فيه، والمشكلة الأكبر أن في ناس اشترت تذاكر سوق سودا، بأسعار كبيرة ودول مش هيعرفوا، يرجعوها أو ياخدوا فلوسهم تاني، غير الناس الكتير اللي بتشتغل ورا الحفلة، والتعاقدات إلخ إلخ.. ده قرار مش هعرف اعمله لوحدي، لأسباب كتير معقدة مش هخوض فيها، وكل اللي قادر اعمله إني أنبه على الجميع، وأكون أمين معاهم، وإني أتابع بقدر المستطاع مع منظمي الحفل تنفيذ خطتهم الوقائية الموضوعة". 

وأكد عيد أن تلك الخطة الموضوعة، تمت مراجعتها مع الجهات المعنية، للتأكد من إتمام كل شيء بشكل سليم، مضيفا: "طبعا كل ده ملوش قيمة بدون التزامنا كلنا وكل شخص يكون مسؤول عشان نفسه، وعشان الناس اللي حواليه".

وأمير عيد هو مغنٍ، وعازف قيثارة، وممثل ولد في حي المعادي، شارك في تأسيس فرقة "كايروكي" التي يعُد واحدا من أبرز أعضائها، كما شارك في بطولة أول فيلم له "لما بنتولد"، ومن أشهر ألبومات فرقته: "مطلوب زعيم"، "ناس وناس"، "نقطة بيضا"، "السكة شمال".