تنشر«الهلال اليوم»، رباعيات شعر عامية للشاعر أحمد عثمان من كتاب "حبات اللؤلؤ":
الضباب بيحيط بروحى *** فى كل ناحية
والخلايق دى تحير *** هى نايمة ولا صاحية
*****************
أول ما تصنع هدف *** أتهنى بحلاوته
وأنساه واحشد قواك *** للجاي من بعده
*****************
صاحبنا خلى المكان *** داير لمصلحته
وصل، وسد الطريق *** للجاي من بعده
*****************
كل ما نيجي نقوم بمظاهرة *** يقولوا سيبوا العجلة تدور
لو دورانها ح يفرم فينا *** لنعدلها لأما تغور
***************
لو جه في يوم *** مالقتش ليك ولا منافس
نافس في نفسك أوعى *** تنسى إن أنت فارس
****************
ياللي ناكرت اللي فات *** عاوزنى تاني أديك
هو أنت وعيك دا مات *** ولا أتعميت في عينيك
***************
فيفي بقمصة خاصمت جوزها *** علشان فاتح تلفزيون
حلفت إن مذيعة خليعة *** غمزة جوزها بسحر عيون
****************
ثقتك بنفسك أساس *** تبني عليه حلمك
حول سهامهم درج *** تطلع عليه لمجدك
***************
الشهيد ذكراه في قلبي *** هو تاجي وهو مجدي
حلمه أصبح لي بوصلة *** والشاهد على ربي
*****************
عاوز توقع مكان *** عين عليه فاشل
ح يلم جنبه الصغار *** ويطرد الفاعل
******************
شايل هموم اللي فات *** والجاي ليه مأزوم
أحسن طريقه لبكره *** بعزم أبني اليوم
***************
بعد كفاحنا سوى *** خدت الثمار وحدك
نجاح بطعم الجراح *** طفى بهجته جشعك
****************
ليه كل فاشل يعلق *** خيبته في رقبتي
مع إن منذ الأزل*** أنا بنيت مجدي