كشفت الفنانة مها أحمد عن سبب هجومها على الفنان أحمد السقا، في منشورها الأخير الذي أثار جدلاً واسعاً على مواقع التواصل الاجتماعي.
وفي بث مباشر عبر حسابها الشخصي بموقع فيسبوك، قالت مها أحمد:" لما كنت بكبوظة كنت بشتغل كويس جدًا ومكنتش محتاجة لحد والناس كلها كانت بتقربلي عايزة تشتغل معايا.. كنت البونبوناية بتاعتهم وبيحبوني.. ومرة واحدة لقيتني ركبي وظهري بيوجعوني وكنت داخلة على مشاكل كتير جدًا، وعملت دايت وخسيت جدًا، وقعدت 3 سنين في البيت وبعدوا عني، وفضلت أسأل هو أنا عملت حاجة غلط؟ هو أنا زعلت حد؟ دي الناس كانت بتتمنى تشتغل معايا.. لحد ما حد قالي السبب إن المنتجين كانوا حاطينك في كاركتر معين لما كنت تخينة".
وتابعت:" لجأت لصديق ليا كان زميلي وزميل جوزي وكان بيروح عند جوزي في بيته وأهل جوزي كانوا فاتحين ذراعيهم ليه والعكس.. مش عيب أني أتكلم معاه وأعيط وأقوله أني حزينة بسبب قعدتي في البيت.. قولت لمجدي أنا هكلم زمايلنا اللي هما نجوم وقوليلهم أني عايزة أشتغل.. قالي متعمليش كده عشان متقلليش من نفسك.. معملتش بكلام مجدي وكلمته وعيطت.. وابتديت أدخل في مرحلة اكتئاب لأني عايزة اشتغل.. بعد يومين لقيته بيكلمني يقولي في دور حلو أوي.. بس كلمي المخرج وأفهمي منه".
وأضافت: " ووافقت وأنا كنت في ساعتها في أشد الاحتياج أني اشتغل.. اتفاجئت أنه اتبعتلي دور غير اللي قالي عليه.. ومكنش فعال ومليش لازمة في المسلسل.. كان ممكن تقول لأصحابك شغلوا مها.. رحت طبعًا واستغربت جدًا عايزة أكلمه.. كنت قولي إنه دور كومبارس ومش هزعل منك.. مكنش لازم أشحت كويس إنكم مترجمنها على إنها شحاتة رغم أني كنت مترجماها على إنها سعي."
واختتمت مها أحمد حديثها مؤكدة أنها لم تندم على هذا المنشور بل راضية تماما لانها ارتاحت نفسيا ولانها تعالج حتى الآن من القهر والحسرة التي شعرت بهما من زميلها.
الجدير بالذكر أنه منذ ساعات قليلة، شنت مها أحمد هجوماً على أحمد السقا، وأمير كرارة، بعد قرار وقف التعامل مع محمد سامي من قبل الشركة المتحدة، وكتبت في منشور لها عبر صفحتها الشخصية بفيسبوك" عوضي على الله دي الجملة اللي دايما بقولها لما اتصدم فأشخاص، الحكاية يا سادة نجمين عملوا مسلسل واتنجمت عليهم بنوتة لسه ألف باء تمثيل، واديتهم على قفاهم وركبت عليهم، إلى أن أصبحت بطلة المسلسل وبطلة الدعاية للمسلسل، وهما راضيين رغم إن طول عمرهم مبيعملوش كده مع أي زميلة لهم أقربها أنا".
