صدر حديثاً ديوان بعنوان "الدليل"، للشاعر أحمد جاد، عن دار المؤسسة للنشر والتوزيع.

يتناول الديوان الكثير من القضايا والتجارب التي مر بها الشاعر خلال مشواره سواء تجارب شخصية له أو تجارب تأثر بها بشكل مباشر واستطاع أن ينسج من خلال الأحداث نصوص شعرية باللغة العامية تناقش تلك القضايا وتصفها بشكل دقيق.

 

ويعدّ الديوان هو أول إنتاج  للشاعر أحمد جاد في مشواره الإبداعي، ومن المقرر أن يشارك به بمعرض القاهرة الدولي للكتاب في دورته ال52 والمقرر أن ينطلق في الفترة بين 30 يونيو الجاري إلى 15 يوليو المقبل بمركز مصر للمعارض والمؤتمرات الدولية بالتجمع الخامس.

 

وحصلت بوابة دار الهلال على قصيدة من ديوان الدليل بعنوان "الغربة" من الشاعر أحمد جاد وذلك قبل طرح الديوان في الأسواق ومعرض القاهرة الدولي للكتاب.

 

"قصيدة الغربة"

 

دقّ السفر بابك وإيد البلد بتسيب

صوت المراكب أعلنوا إنك خلاص هتغيب

يمكن سنة يمكن سنين

يمكن كمان تفضل هناك

وتبص مين غيرك معاك

لِّم الصور لِّم البيوت لِّم الصحاب

لِّم أي شيء يدَّفي.. ينفع في البرد اللي هناك

واحضن الأشياء قوي واحفظها جوة القلب

يا عالِم هتاخدك قد إيه الغربة؟

هتوصل أرض غير أرضك

يا دوب توصل تلاقي الشوق بيندهلك

وكل شيء مرّ ف حياتك يبقي كوم

وآخر حضن من أمك هيفضل كوم

يعدي يومين

تنام هي علي غيابك وتصحي عليه

بدون إدراك

تقول لأختك ادخلي صحيه

أو إسأليه هياكل إيه

يعدي يومين

يدور بينك وبين بلدك حوار

اروح علي فين

مانا جنبك وحيد لكن

بعيد عنك غريب ووحيد

أروح علي فين

حوار ظالم بصوت مكتوم

فادني بإيه الجمال لو عيني مش شايفة

وتفيد بإيه قوتي لو كنتي مكسورة

فادني بإيه الشبع لو كنتي يوم خايفة

ويفيد بإيه السلاح لو ايدي مبتورة

برة البلد غربة

جوة البلد غربة

الغربة فيلم كبير مابين هنا وهناك

هنا أهلك

هناك وحدك

هنا روحك

هناك جسمك

وبينهم ذكريات عمرك

تقعد لوحدك والفراق مجرم

والليل يجيلك بالصور كل أما تنسي يفكرك

صوت ضحك عالي مفتعل مؤلم

برواز مداري كل شئ بيكسرك

تشبه حصان المعركة

مقسومة روحك بالسيوف

لا ليك في أرض ولا بيقلولك يابطل

وإن عِشتها بتعيش في خوف

قاعد بتحسب قد إيه كان الطريق

مرت حياتك ثانيتين ولا شريطك كان طويل

غياب كافر ماخدش باله إنك بريء

قاعد تقول

أنا السهران علي بابِك عيونك ضفتين النيل

يا بُعد الصحبة في غيابِك وطول الليل

 

وأول صبح يجي عليك وأول ليل

وأول ناس متعرفهاش

وأول شمس ماتشوفهاش

تكمل وحدك السكة

تقاسم روحك اللقمة

تشوف اللّمة جمعا الناس وماتعشهاش

 

أحمد جاد شاعر عامية مصري من مواليد محافظة  الإسكندرية، بدأ بكتابة الشعر في سن مبكر من عمره، وله دواوين شعرية مختلفة خلال رحتله الإبداعية، وذلك قبل أن يقوم بإصدار أول ديوان شعري له "الدليل".