عبرت الفنانة عفاف شعيب، عن رأيها في أزمة الفنانة حلا شيحة وقرار ابتعادها عن الفن والإلتزام بالحجاب.

وقالت عفاف شعيب خلال استضافتها في برنامج "ليالي تن": "حلا شيحة تعيش فترة وهتعدي، وهي لذيذة ودمها خفيف وممثلة كويسة وبموت في وجهها، اتركوها في حالها ؛ كل إنسان حر في قراره، هو إحنا هنموت مع بعض ولا كل واحد هيموت لوحده

وأضافت عفاف شعيب: "كل واحد حر في حياته مش كل واحد هيكون على التاني رقيب حاسبوا أنفسكم قبل أن تحاسبوا، يعني أنا المفروض أحاسب نفسي وأشوف أخطائي ايه وأصلحها، كل واحد حر إحنا مش هنحاسب حد، وأكيد فيه حد استفزها".

وفي وقت سابق، ردت الفنانة حلا شيحة، على بيان نقابة المهن التمثيلية، الذي أعلنت فيه شطب عضويتها من النقابة، بعد تصريحاتها الأخيرة التي أثارت الجدل بإعلان اعتزالها.

وكتبت "حلا" عبر حسابها على "إنستجرام": "حابة أشكر كل الناس الجميلة على رسايلهم الجميلة المشجعة، وحابة أشكر كل الصحافة اللي نشرت فتوى دار الإفتاء النهاردة، اللي موقفي هو نفس موقفها، اللي بيوضح إن التمثيل والفن عموما زي أي مهنة في الدنيا، حلاله حلال وحرامه حرام.. وأنا لا أحب أن أكون جزءا من أي نوع من التطرف، سواء باسم الدين، أو باسم الفن.. ولو نقابة المهن التمثيلية ترفض موقف دار الإفتاء الواضح فهنيئا لي بشطبها لعضويتي".

وأضافت: "حبي للفن محدش يقدر ينكره ولا يزايد عليه.. أنا ماتكلمتش غير عن نفسي، وبقدر كل زمايلي.. الزميل الوحيد اللي ذكرته هو اللي الموضوع أصلا متعلق بيه.. وعتابي ليه لحسن ظني بيه.. والعتاب في الملأ عشان الكليب في الملأ".

واستكملت: "وبالنسبة للكلام غير اللائق عن الأجر.. كل اللي في المجال شاهدين أني كنت باعتذر عن عدد كبير من الأعمال الفنية، وكنت بقبل أجور أقل مما يتناسب معي، تعاونا مع صناع الأعمال.. وأصلا ما استلمتش الجزء الأخير من أجري في الفيلم، لما اتأخر نزوله جدا، وبدأت اتغير وأصلّح.. لأن بصراحة الكلام عن (أجر كبير) ضحكني".

وأضافت: "أنا فنانة بطبعي ومن صغري وكل اللي يعرفوني عارفين حبي للفن.. ودايما هعبر عن نفسي بمواهبي الفنية لما أحب، لكن الجديد أني مش هاعمل كده على حساب اللي أنا مؤمنة بيه بجد جوايا، زي ما قولت مؤخرا.. أنا لا أهاجم أحدا، ولا أحارب أحدا، ولا أنا أفضل من أحد، ولا أنصح أحدا قبل ما أنصح نفسي أولا، وكلنا نخطئ، مفيش حد معصوم من الخطأ، وباتمني الخير دايما لكل الناس، بمن فيهم كل زمايلي، وصناع العمل".

واختتمت: "مفيش أجمل من أننا نعيش ونستمتع بحياتنا ونفرح ونتبسط ونبسط ولادنا ونفرحهم ونفرح معاهم ونربيهم على قيم وأخلاق مبقتش موجودة في أيامنا دي، ونربيهم ونتربى معاهم ونغلط ونصلح وحنفضل نغلط ونصلح ولازم نغلط بس جميل اننا نعترف بغلطنا ونصلحه ونتعلم منه وحنفضل نتعلم لحد ما نموت ونعيش مع كلام ربنا الجميل ونفرح بمنهجه ونحب الحق والعدل والخير والجمال والإبداع الرباني الجميل، جميل إننا نعمل كل ده وفق منهج مفيش أجمل منه ولا أعدل منه ولا أعظم منه في الكون كله".