تذكر رواد موقع العواصل الاجتماعي «فيسبوك»، الفنان الراحل شعبان عبد الرحيم، وذلك بنشر لقائه مع المذيع طوني خليفة، حين طرح عليه بعض الأسئلة، ليذكر أسماء الذين من خذلوه، لكن شعبان رفض قائلا إنها "قلة أصل" أن يذكر الأسماء.
- مين اللي ساعدته كتير بس طلع بالنهاية قليل الاصل؟
=لا ده ناس كتير
- قولي اسم ، مين أكتر واحد انت بتعتبر انك ساعدته كتير بس طلع قليل الاصل معاك؟
= لا كده يبقى انا بقى معملتش واجب مع حد خلاص
- لا لازم تقولي اسم شخص
= أصل قلة الاصل متوفرة ، قلة الاصل ع الكيف يعني أول ما يجيله مزاجه يقل بأصله
- طب مين أكتر شخص بتعتبر انه طعـنك او غدر؟
= أنا دلوقتي ناسي..
ـ أنا عديت حاجات لانه مش عاوز يقولوا جاب شعبان عبد الرحيم عشان يخبط في الناس، بس دي أنا عاوز اعرفها منك ، مين أكتر شخص بتعتبر انه طعنك؟
= أنا مقدرش اتكلم عن حد خالص يا عم طوني وأقولك فلان عمل كذا مينفعش، عيبة في حقي أنا راجل ابن بلد، ومحبش حد يزعل مني فمش لازم أقول فلان، أي واحد قل بأصله معايا هو عارف نفسه وخلاص، وكمان هيشكرني دلوقتي إن أنا مش راضي أقول عليه، وبعدين ناس كتير اوي قلت بأصلها أنا هقول على مين ولا مين.
- طب مين اللي ساعدك وانت مكنتش أصيل معاه ؟؟
= برضه ناس كتير أوي، دي اللي ممكن أقولك عليها، ناس كتير وقفت جنبي وأنا اللي غلطان في حقهم وانا بقولهم حقكم عليا.
- زي مين ؟؟
= أي حد كان عيان وانا مسألتش عليه
- شعبان قول؟!
= انا أقول لعم حسني أبو تامر حسني، أقوله حقك عليا وانا غلطان في حقك، هو وقف جنبي كتير وهو عيان دلوقتي أنا مرحتلوش ولا شوفته لحد دلوقتي، وانا بتأسف له وهروح له على عيني وغصب عن أبويا كمان وحقك عليا يا عم حسني.
هذا الموقف أثار تعاطف المتابعين، وعلق أحدهم قائلا: "حوار جميل بجد، وإنسان أصيل فعلا رغم بساطته الله يرحمه.. المعني دا في ناس متعلمة كتبر ومستويات مابتوصلوش، وحتى الناس الكويسة مش طول الوقت تقدر تعمل كده، وماتفضحش حد قل بأصله معاها.. الله يرحمه ويغفر له ويتجاوز عن سيئاته".
وعلق آخر: "الأصول والجدعنة يعنى عم شعبان عبد الرحيم"، وأضاف متابع آخر: "مش كان راجل بسيط ومش معاه شهادات عليا ولا لغات ولا الكلام اللي بيتنططو بيه ده.. بس أنضف مليون مرة من الناس اللي في الوسط الفني دلوقتي، والاسم جايين من طبقة رفيعة، وهما بيقولوا على بعض كلام مش حلو، في البرامج والسوشيال ميديا".
