تنشر بوابة دار الهلال قصيدة جديدة للشاعرة مروة الشريف، بعنوان "وبقسى عليك"، وجاء فيها:
وبقسى عليك
ما من غُلبي
وقلبي يقولي إي ذنبي
فـ ارد وعيني مكسورة وماليها الشوق
عشان فاتنا وهونا عليه
ولا مره حنينه شكى له وسمعله
عرفت القسوة كانت ليه
يرد يقول وحشتيني
ويسألني.. وحشتك
قد أي قولي
وارد ودمعي جوايا
بحور بتسيل
وابين إني مش باقية
وبتكابر
واعاند قلبي وبقسوة
وارد عليه
هتوحشني ده يطلع إي
واداري عنيا منه بعيد
فتغلبني دموع عيني
واخاف شوقي عليا يبان
واحس بقلبي إنه اتهان
ففض العركة واستأذن
ترن في ودني نبرة صوته ليا زمان
وحشتيني وحشتيني
بحبك يا منى عيني
يا كل الباقي في سنيني
خدي عمري وسامحيني
فيغلبني حنيني إليه
ويوحشني مجرد إنه لَف عنيه
بعلو أنين بنادي عليه
فيسبقني يمد إيديه
فبنسى بإني هونت عليه
وبرجعله وبسمعله
وبنسى بإنه ودعني
وبنسى القسوة كانت ليه