شاب وسيم خفيف الظل، خطف قلوب الفتيات وتربع على عرش النجومية، وبات أحد أشهر "جانات" السينما المصرية، دخل الفن صدفة ولكنه كان مسكوناً به منذ نعومة أظافره، وقفت أمامه نجمات السينما وأشهرها، طارده لقب "الولد الشقي" في أفلامه بعد أن كسر الشكل التقليدي لبطل السينما الذي كان يظهر بشعر مصفف ويرتدي "البذلة" طوال الوقت، ليجسد أدوار الشاب "ابن الذوات" الذي يترك دراسته ولا يفلح في شئ إلا مغازلة "بنت الجيران" ويطارد الجميلات بسيارته المكشوفة، وهو مرتدياً قميصاً "كاجوال" مفتوحاً حتى أصبح أيقونة للموضة يُقلده الشباب في جيله، وبات فتى أحلام الفتيات، وهو الأعلى أجراً بين "جانات" السينما في الخمسينيات الفنان أحمد رمزي.
في إحدى حلقات برنامجها "نجمك المفضل" الذي كانت تقدمه المذيعة ليلى رستم كان ضيفها أحمد رمزي النجم اللامع في الستينيات، جلس "رمزي" وأطلق لـ "أزرار" قميصه العنان ولكن إلي الأسفل ليكشف عن سلسلة بخرزة زرقاء وهو ما لفت إنتباه "رستم" التي سألته "إيه حكاية القميص اللي انت دايما فاتحه ده؟"، ليقاطعها "أنا مش عارف إيه حكاية القميص ده زرار من فوق وزرار من تحت وكل شوية واحد يكتب لي حاجة فيها إيه دي؟" لترد عليه "أنت مش شايف أنها حاجة غريبة شوية والسلسلة كمان"، ليقول لها "السلسلة حاجة شخصية فيها خرزة زرقا علشان العين أنا مابصدقش في العين بس بخاف " فترد "يعني حاطت خرزة زرقا عشان الناس ماتحسدكش فعلا مقتنع يعني؟"، ليرد عليها "آه.. هو بيني وبينك مش أنا اللي حاطتها أصلا" فتسأله"سر يعني؟ فيقول "لا مش سر المدام هي إديتهالي علشان خايفة عليا" ويضحك فترد هي ضاحكة وتقول "ياختي عليه".
سنوات مرت على تلك الواقعة وما زال الفيديو يتم تداوله حتى الآن على مواقع التواصل الاجتماعي، وخاصة بالتزامن مع ذكرى ميلاد أو وفاة "الولد الشقي" وسبب لغطًا كبيرًا، وصل إلي أن البعض قال أن جملة "ياختي عليه" تسببت في انفصال ليلى رستم من زوجها بعد حوارها مع "أحمد" والذي أعتبر أنها مغازلة منها لـ "رمزي".
ليلى رستم روت سبب إطلاقها جملة "ياختي عليه" في حوار لها مع مفيد فوزي في برنامج "مفاتيح" وقالت "أول ما وصل قالي المنتج دلوقتي زمانه متضايق أوي لأني بضيع له وقته وفلوسه لأني جيت هنا ساعة وكان المفروض أبقى في الاستديو.. يعني احنا تضييع وقت".
وتابعت "مش عارفة ايه اللي جاب حكاية ياختي عليه دي هو كان فرحان بنفسه زي ما يكون طفل ونجح في الامتحان فانا استغربت هو ليه فرحان أوي كده علشان جيه قعد في الاستديو ولا علشان بقى نجم، طب ما فيه نجوم كتير بيجولنا وماحدش بيحملنا الجمايل دي كلها، وابتديت أضحك معاه شوية و بقوله إيه السلاسل اللي انت حاططها دي.. سلاسل غير طبيعية وماكنتش الحاجات دى بتحصل زمان و فاتح الزراير وكنت بقولها بنوع من التهكم وتقريبا هو ده اللي ضايقه، قالي دي هدايا جاتلي من ناس أعرفهم، وبقوله دي خرزة زرقاء انت خايف من الحسد ولا إيه قالي لا دي مراتي اللي حطاها خايفة عليا".
مضيفة "قولت ياختي عليه.. طفل صغير أصل احنا في التقاليد عندنا لما يتولد طفل بنحط له الخرزة الزرقا وانا كنت شايفة انه طفل عنده 27 سنة، وبلغني إنه قال كلام مش لطيف".
إيمان الكرداني ابنة الإعلامية الكبيرة ليلى رستم نفت الكلام الذي يتردد بشأن انفصال والدها عن والدتها بعد حوارها مع أحمد رمزي وقالت "إيمان" في لقاء لها ببرنامج "الستات مايعرفوش يكدبوا": "هذا الكلام لا يمت للحقيقة بأي صلة، والحوار كان سنة 1962 وانفصال والدي ووالدتي كان 1970، غير أن والدي كان صديقا للفنان أحمد رمزي وقام مرة بدعوته على العشاء أكثر من مرة بعد هذا اللقاء، والجملة هي قالت بطريقة عفوية".