هاجم حسين حبيب نجله حسام حبيب ، بسبب تصريحاته التي أدلى بها أمس في أحد البرامج التليفزيونية، وقال إن شيرين تضع أكثر من نصف أموالها في البنك خارج مصر بـ أسماء بناتها حفاظا عليها من أهلها في المستقبل.

وكتب حسين حبيب والد حسام حبيب على حسابه الشخصي بموقع التواصل الاجتماعى فيسبوك منشورا قائلا: قولوا الحق ولو علي أنفسكم، هو ينفع أخالف شرع ربنا بحجة إني أحمي أولادي البنات ليها الثلثين والأهل ليهم الثلث بعد عمر طويل وده يخلي الأهل راضيين ويراعوا البنات بعد عمر طويل، ودي صلة رحم.

مؤكدًا، أنت كده مش بتحافظ على مال زوجتك أنت بتخالف شرع ربنا، والنتيجة أنهم فضحوها وقضوا على مستقبلها، وزرعت العداوة بينهم وحطمت زوجتك بجهلك بشرع ربنا، ولو كنت بتسأل أبوك كان أرشدك للحق والكل طلع كسبان يا قاطع صله الرحم وعاصي أبوك.. ضيعت نفسك وضيعت البنت معاك.

وأضاف: هو ينفع أخوها بقاله أكتر من عشرين سنة بيراعي أخته وهي مصدر رزقه أجي اقفل عليه الحنفية؟، ويقعد أربع سنين من غير شغل وراجع تاني تقفل عليه الحنفية.. هو وأمه وأخته وعايزه يسيبك، يا ناوي على قوتي يا ناوي على موتي، الزوج يتعوض الأم والأخ ما يتعوضوش.. دي كلمه حق لوجه الله والدين النصيحة.

والد حسام حبيب يهاجم نجله

واستكمل والد حسام حبيب حديثه: أنت بتقول لما رجعت ليها العربية، واحد بيشتغل معاها أخد العربية اللي بـ 5 مليون وقالها هابقي أديكي بيها شغل، وواحد محاسب تعرفه قريب شكالها حاله أعطت له 100 ألف دولار وخلع، وأنها بتكتب شيكات للناس على بياض.. أنت كده بتدي مبرر لأهلها ليحجروا عليها وبتطلعها أنها سفيهه وعبيطه وأنا من معرفتي بيها إنها واعية وناصحة، بتيجي تكحلها تعميها.. اسأل أبوك يقولك تقول ايه، أنت بتقول أنك عمرك ما اخدت منها فلوس وأهلها عايشين على قفاها وأنك ما بتشتغلش أربع سنين كنت عايش على قفا مين!

واختتم حسين حبيب: هي قالت لي يابابا أنا عايزه أتجوز راجل يصرف عليا وقلتله عايزك تشتغل وتصرف على بيتك عشان تكبر في نظر مراتك وتحترمك، الحب وحده لا يكفي، اخدت مني مليون جنيه عشان تشطب فيلتك وما تعيش في بيت مراتك وها اردهملك.. ومن ساعة ما اتطلقت، وأنا بصرف عليك ورايح تقول لعمرو أديب وتهاجمني لتاني مره أنك ماتعرفنيش من 14سنه.. ما بتعرفنيش إلا للمصلحة وعشان تاخد فلوس وما دخلتش بيتى سبع سنين، وجيت بس تاخد فلوس وقلت ما بتشتغلش عشان شيرين ومشاكلها كانت شغلاك بقالك سنه مطلقها ما اشتغلتش ليه بطل حجج وخليك راجل.. أنت فعلا مش تربيتي أنت تربية واحدة ست طلعت من بيت مامي على بيت مراتك يا أخي عرتنا.