كشفت الفنانة جميلة عزيز، تفاصيل دخولها الوسط الفني، بجانب الكشف عن تفاصيل إصابتها بوعكة صحية كبيرة خلال الفنرة الماضية وارتدائها الحجاب.
وقالت جميلة عزيز، في لقائها مع الإعلامية إنجي هشام، في برنامج "المنسي" المذاع عبر شاشة قناة "هي": بدأت الفن مع الفنان العظيم العبقري الأستاذ محمد صبحي، مقدرش أنكر جمايله عليا هو اللي حببني في الفن، على الرغم من أنه شديد في شغله، لكن شدته دي بتحبب الفنان في الفن وبتعلمه، كانت أول خطوة بالنسبة ليا خطوة حلوة، وهو اللي رشحني لـ مسلسل يوميات ونيس.
وعن تفاصيل وعكتها الصحية، فقالت جميلة عزيز: آخر عملين ليا كانوا أفراح إبليس والشوارع الخلفية، وبعدين جاتلي وعكة صحية وخدت عهد بيني وبين ربنا أني أطلع من الوعكة دي وأتحجب، كانت وعكة صحية شديدة جدًا وكنت فيها لوحدي، وكان تعبي النفسي أكتر من الصحي، واللي بيمرض وهو لوحده وأعز أصحابه وأحبابه مش معاه وتخلوا عنه وقت المرض غير اللي عنده ضمير وأصل.
وتابعت: أنا أمي متوفية ووالدي راجل كبير في السن، فمكنش عندي غير ربنا، والناس اللي عندهم ضمير زي الدكتور أشرف زكي، والنقابة كانوا واقفين جنبي وبيسألوا عليا.
وأضافت: كانت في صديقة ليا حميمة في الوسط الفني هي فنانة وبناكل وبنشرب مع بعض، وصلها أني تعبانة ومرفعتش سماعة التليفون تسأل، مع أن كان في خلاف بسيط جدًا بيني وبينها زي أي أصحاب ولكن ساعة المرض المفروض ينسى كل حاجة، وأقل حاجة ارفعي السماعة وأدعميني دعم نفسي، والدعم الفني ده بيخفف.
واستكملت: ولغاية دلوقتي مفيش أي تواصل بينا، ولما حصلها ظروف سألت عليها وقولت لوالدتها أنا مش هقدر أجي ليها دلوقتي لأني تعبانة وباخد دواء، قالتلي سلامتك وهنجيلك، ومحدش جه، وكان عندي أمل أنها تيجي وتسأل عليا، عمري ما هنسى، أنا وقفت جنبها وقفات جدعنة كتير ومبتأخرش عليها.
وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.