أمى الغالية حبيبة القلب والروح اللى من غيرها الحياة ملهاش أى معنى إنتى الملجأ اللى بحتاجه لما أكون زعلانة والحضن الحنين و الدافئ اللى بيضمنى لما بحتاج الأمان، أمى إنتى صحبتى وصديقتى و كاتمة أسرارى و إنتى اللى على طول واقفة جنبى وفى ضهرى، إنتى اللى دايما تستحملينى لما بغلط واتصرف تصرفات من وجهة نظرى إنها صح بس هى غلط وحتى لما بتعاقبينى بتعرفينى الأول إيه السبب وتفهمينى أنا غلطت فى إيه دايما محوطانى أنا وأخواتى ومخلية بالك علينا.
عارفه يا أمى أنا دايما بقول إن مفيش حاجه اسمها يوم عيد للأم لأن كل يوم إنتى موجودة فيه معانا وبنحس بنفسك وتلمينا حواليكى هو بالنسبة لنا يوم عيد عارفه يا أمى برغم إن أنا بغيير عليكى وبحب إنك تكونى ليا أنا وبس ولكن بكون فرحانة وفخورة لما بتتعاملى مع كل الأولاد والبنات على أنهم أولادك والجميع بيحبك أنا.. اتعلمت منك إن لما أعمل حاجه لازم أعملها صح وبإتقان أتعلمت إنى أكون رقيبة على نفسى وأحكم ضميرى فى كل عمل وإن محبة الناس حاجة عظيمة ربنا يديمها علينا أمى بحبك أوى ربنا يباركلنا فيكى وتفضلى طول عمرك جيشنا اللى بيحمينا.
