استضافت الفنانة والإعلامية إسعاد يونس، الفنانة أميرة أديب في برنامج"صاحبة السعادة" أمس، وتحدثت عن طفولتها وتجربتها مع التمثيل، سبب رفض أهلها مساعدتها لدخول المجال.
وقالت أميرة أديب: "أهلي في البداية كانوا رافضين مساعدتي أن أدخل مجال التمثيل، لكن أنا قررت أخوض التجربة بعيد عنهم تماما ورفعت شعار لن أعيش في جلباب أبي، خدت السوشيال ميديا وسيلة ليا في بداية المشوار، مع أني كنت ارفضها، لكن في نفس الوقت ماكنتش عارفة أبدا إزاي".
أضافت أميرة أديب: "بدأت في نشر الفيديوهات قلت نفسي لما أرجع مصر أكون معروفة والمخرجين يطلبوني؛ فبدأت أعمل الفيديوهات، والناس بدأت تتابعني، الفيديو اللي نشرته وقت الكورونا كان بداية نقطة تحول ليا وبدأت الناس تعرفني أكتر".
تابعت: "ماما برضوا كانت رافضة في الأول أن اعمل فيديوهات على السوشيال ميديا، الموضوع في البداية كان مختلف مكنش فيه عائد مادي زي دلوقتي، أنا من أوائل الناس اللي عملت محتوي على السوشيال ميديا".
طفولة أميرة أديب
كما تحدثت عن تربيتها: "أهلي ربوني أنني اعتمد على نفسي، أول مرة سافرت لوحدي كان عندي 12 سنة معرفش أزاي. من وأنا صغيرة بيقولولي انتي هتدرسي برا فهاتي درجات كويسة، دي حاجة كنت عارفة أنها هتحصل، وعارفة ان انا هتكيف مع أي مكان، رحت أمريكا فرشت البيت وعيشت مع 8. محستش بأي حاجة غريبة وكنت جاهزة جدًا إنني أعيش لوحدي. أهلي برضه من وأحنا صغيرين مربييني انني أول ما أطلع بطاقة يبقى هشتغل، ودة معناه إن لو عزت أي رفاهية لازم أصرف عليها. فابتديت أعلم جومباز ورقص في الحضانة. أبتديت اعمل كدة عشان أحوش وأسافر. أمي كانت بتحاول تعودني أبقى مستفلة، ماما قالت عايزة موبايل أو جيتار أي حاجة غير اساسيات الحياة، هتجيبيها لنفسك".
جدير بالذكر أن أميرة أديب قدمت العديد من الأعمال خلال الفترة السابقة وكان آخر أعمالها في الجزء الثاني من مسلسل وبينا معاد، تأليف وإخراج هاني كمال وشارك في العمل كل من شيرين رضا، صبري فواز، مدحت صالح، بسمة، وفاء صادق، محمد سليمان، دنيا جمعة، هاجر الشرنوبي، أسامة الهندي، أية سليم وآخرين.