كشفت الفنانة ساندي عن كواليس تجربتها في العلاج على يد "سمكري البني آدمين"، وقالت أنها حذرت منه من عامين بعد أن تسبب لها في إصابة تعاني من مضاعفاتها حتى الآن.

وقالت ساندي في مداخلة هاتفية ببرنامج حضرة المواطن" الذي يقدمه الإعلامي سيد على قناة الحدث اليوم "الموضوع بقاله سنتين وبقالي كتير أوي بناشد الناس تاخد بالها من الراجل ده، أنا شفت له "ستوري" عند فنانين كتير، فسألت زمايلي يا جماعة هو الراجل ده بيعالج بجد، عشان أنا عندي مشكلة إعوجاج في عمودي الفقري، وقالولي إن الراجل ده شاطر وريحنا جدا."

وأضافت: "هما طبعا ماكنوش عارفين المصايب اللي بعد كده، طبعا لما روحت له قولتله دي الأشعة قالي لا أشعة إيه احنا هنظبط لك كل حاجة، طبعا أنه مش دكتور، فـ مش مهتم بأشعة إكس، ولا بـ"رنين "ولا أي حاجة، طقطقلي رقبتي، وبعدها بأسبوع كان في ختام مهرجان الجونة السينمائي، وفجأة حسيت إني مش قادرة أقف، ونقلوني المستشفى".

مضيفة "لما عملت أشعة الدكتور قاللي إنت عملت حادثة؟ قالي أصل الغضروف لامس النخاع الشوكي كان يشلك شلل رباعي، ودي حادثة كبيرة ولما وريته فيديو كنت لسه منزلاه للدكتور، قاللي طبعا ده اللي عملك كده."

وتابعت " كلمته قولتله انت عملتلي إعاقة يعني عاهة مستديمة، وطلبت من أخويا يسأل أصحابه ويحرى عن أسمه قالي ده مزور بطاقين وده كتبته من سنتين وأنه بكالوريوس سياحة وفنادق"

وعن حالتها الصحية الآن، قالت "أنا لحد دلوقت مصابة وأوقات كثير الدم مبيوصلش للمخ مظبوط من الغضروف اللي هو عامل لي فيه مشكلة ببقى في حالة إغماء هو أذاني أذية غير عادية."

وكانت أجهزة الأمن قد ضبطت "ي.خ" الشهير بـ"سمكري البني آدمين"وأمرت النيابة المختصة بحبسه 4 أيام على ذمة التحقيقات بتهمة استبدال المهنة في بطاقة الرقم القومي، من خريج تربية رياضية إلى طبيب علاج طبيعي، وتزوير شهادة التخرج الخاصة به.